Një ditë para përvjetorit të masakrës së Reçakut, në Prishtinë, ish-ambasadori i OSBE-së, William Walker, ka promovuar librin që flet pikërisht për këtë masakër. Vetë autori tha se ky libër mbetet një dëshmi se çfarë bëri Serbia mbi civilët e pafajshëm në Reçak gjatë vitit 1999.
Masakra e Reçakut ishte e tmerrshme dhe ky libër ka për qëllim prezantimin para botës për mizoritë dhe masakrat serbe të cilat ndodhën në vitin 1998/99. Një nga dëshmitarët e kësaj masakre tha se nëpërmjet këtij libri do të dëshmohet më fort krimi makabër që u bë në në Reçak.
“Më kujtohet mirë ajo ditë sikurse sot kur ambasadori Wallker arriti në Reçak konkretisht në Kodrën e Bebushit, pasi pa tmerrin ambasadori u ndal për një çast dhe tha kurrë në jetën time kështu nuk kam pa. E njoftoi botën nga vendi se çka po ndodh në Kosovë konkretisht në fshatin Reçak”, tha Agron Mehmeti dëshmitar në Hagë
Vetë autori tha se ky libër mbetet një dëshmi se çfarë bëri Serbia mbi civilët e pafajshëm në Reçak gjatë vitit 1999.
“I prija misionit me 1200 vëzhgues nga vendet demokratike të botës, për synim kishim vëzhgimin e gjithë asaj çka po ndodhte dhe të tregojmë të vërtetën pa anime. Por ajo që e pamë ishte e pa shembull dhe s’kishte si të mos t’i tregoje botës për krimin që po ndodhte. Të jeni krenar me të gjitha të arriturat. Republika e Kosovës nuk është kërcënim për askënd në shoqëritë demokratike, ndërsa i vetmi kërcënim është qeveria në Beograd me fytyra të reja dhe njëmendësi të Millosheviqit. Kosova është diamant për të cilin keni kontribuar dhe të jeni krenare për kontributin tuaj qe e keni bërë dhe po e bëni”, tha Walker.
Walker tha se nëpërmjet këtij libri do ti tregohet botës mbi masakrën që bënë serbët mbi shqiptarët.
