Kryeprokurori i Prokurorisë Themelore në Prishtinë, Zejnullah Gashi, ka bërë të ditur se kanë përfunduar hetimet dhe kanë ngritur aktakuzë për të akuzuarit për vrasjen e Liridona Ademajt. Të akuzuarit janë, Naim Murseli, Kushtrim Kokalla dhe Granit Plava.
Kryeprokurori i Prokurorisë Themelore në Prishtinë, Zejnullah Gashi ka theksuar në konferencë pëe media ka thënë se ka qenë rast i ndjeshëm. Sipas tij, rasti ka qenë i inskenuar si grabitje, mirëpo falë angazhimit maksimal të hetuesve dhe prokurorëve, brenda një afati të shkurtë kohor kemi arritur të zbulojmë kryesit e kësaj vepre kriminale.
“Ka qenë një rast jashtëzakonisht i ndjeshëm edhe sa i përket kompleksitetit të saj, dhe janë zhvilluar hetime në shumë dimensione, për arsye se kemi siguruar ekspertiza edhe brenda edhe jashtë Kosovës”, ka deklaruar Gashi.
Në konferencë ka folur edhe prokurorja e rastit e poashtu edhe hetuesit.
Ndërkaq, prokurorja e rastit, Javorka Prelinqeviq, tha se e kanë kuptuar se pse ka ndodhur motivi i vrasjes në momentin kur kanë bashkëpunuar me shtetit suedez.
“Prova materiale në këtë lëndë janë grumbulluar shumë shpejt, megjithatë se çfarë ka munguar, ka munguar motivi i cili i ka shtyrë kryerësit e veprës penale për të kryer këtë vepër. Andaj iu kemi drejtuar edhe Mbretërisë së Suedisë për raportet e tyre duke e marre parasysh se ata kane qenë edhe shtetas të Suedisë. Kemi ardhur deri te motivi, e kemi shpjeguar dhe pastaj e kemi kuptuar pse ka ndodhur vrasja e saj. Gjatë ngritjes së aktakuzës nuk kemi një provë ose një tjetër provë kryesore, por kemi shumë prova ma materiale. Mirëpo çka mund të them është se sa kanë jetuar në Suedi kanë pasur probleme dhe ç’rregullime martesore dhe probleme pasurore. Marrëveshje në këtë lëndë për pranim të fajësisë nuk ka pasur, edhe pse ka pasur kërkesë. Në këtë rast nuk do të ketë marrëveshje për pranim të fajësisë”, ka theksuar prokurorja e rastit.
Liridona Ademaj është vrarë më 29 nëntor të vitit 2023, ndërsa të dyshuarit për planifikimin dhe ekzekutimin e krimit të rëndë janë bashkëshorti i viktimës, Naim Murseli, si edhe Granit Plava e Kushtrim Kokalla.
Rasti i vrasjes së 39-vjeçares, fillimisht ishte hetuar si “grabitje me pasoja vrasje”, por hetimet intensive kishin rezultuar me arrestimin e tre personave, ku Murseli, konsiderohet si koka prapa krimit tronditës.
