Presidenti i sapozgjedhur i SHBA-së, Donald Trump, ka udhëzuar ndihmësit e tij që të organizojnë një bisedë telefonike me presidentin rus Vladimir Putin brenda ditëve nga marrja e detyrës më 20 janar. Këtë e raporton CNN duke cituar burime.
Sipas tyre, një nga qëllimet e bisedës është “të diskutohet një takim personal në muajt e ardhshëm për t’i dhënë fund luftës në Ukrainë”.
Ekipi i Trump filloi të punojë për të aranzhuar një telefonatë me Putinin disa javë më parë, por është e paqartë nëse një datë është finalizuar për thirrjen, shkruan CNN.
Në fillim të janarit, Trump tha se përgatitjet për takimin e tij me presidentin rus ishin duke u zhvilluar dhe ai mund të ndodhë “shumë shpejt” pasi ai të marrë detyrën më 20 janar.
“Do ta kisha bërë më shpejt, por <…> duhet të futesh në zyrë. Për disa gjëra duhet të jesh aty,” tha Trump në një intervistë për Newsmax.
Kur u pyet për strategjinë e tij për t’i dhënë fund luftës midis Rusisë dhe Ukrainës, Trump u përgjigj se “ka vetëm një strategji dhe kjo varet nga Putini”. “Nuk mund ta imagjinoj që ai është i emocionuar me mënyrën se si po shkojnë gjërat, sepse as për të nuk po shkon mirë”, tha presidenti i zgjedhur i SHBA-së.
Donald Trump ka thënë vazhdimisht se është i gatshëm t’i japë fund luftës ruso-ukrainase. Gjatë fushatës zgjedhore, Trump premtoi se do ta bënte këtë “brenda 24 orëve” pasi të bëhej president i SHBA. Më 7 janar, presidenti i zgjedhur i SHBA-së shpalli një afat më realist prej gjashtë muajsh për ndërprerjen e armiqësive.
