Kreu i qeveris së Kosovës Albin Kurti ka rikutjuar aksionin e dytë ndaj ndaj familjes së Shaban Jasharit 27 vite më parë më 22 janar. Ai në një postim në rrjetin social shkruan se kjo ndodhi plot 6 vite pas aksionit të parë të 30 dhjetorit 1991 dhe 6 javë para aksionit apo rrethimit të tretë të 5 marsit 1998.
“Atë mëngjes dimri, pasi i kishin rrethuar shtëpitë e Shaban Muratit në Prekaz të Ulët, njësite speciale policore serbe kryen një aksion rrufe me synim që t’i kapnin të gjallë apo edhe t’i vrisnin Hamzën dhe Ademin. Por ashtu siç kishin rezistuar gjatë aksionit të parë edhe asaj radhe familja Jashari i rezistoi po me armë sulmit brutal me mortaja dhe breshëri të shtënash që kishte zgjatur rreth gjysmë ore.
Hamza nga shtëpia dhe Shabani me tre nipa të tij nga oda, luftuan duke i zmbrapsur policët në terrin e atij mëngjesi të hershëm. Ademi kishte qëlluar në Llaushë te dajët e tij, por ky rast u bë shkak që ai dhe Hamza t’i jepnin fund periudhës së tyre të ilegalitetit.
Përveç dëmeve materiale, gjatë atij aksioni policët e plagosën Selvete Hamëz Jasharin në shpinë dhe Iliriana Rifat Jasharin në dorë. Ndërkaq pas largimit, në tërheqje e sipër, policët serbë e qëlluan për vdekje një kalimtar rasti: Hysen Manxhollin nga Mikushnica që po shkonte në punë.
Ky aksion brutal policor, ishte testi i fundit i regjimit kriminal të Serbisë ndaj familjes Jashari në Prekaz, para provës finale që erdhi më 5 mars 1998. Nga rezistenca e tyre erdhi liria, nga nderimi i tyre mirëmbahet kujtesa kolektive, nga mirënjohja ndaj sakrificës së tyre ruhet tradita dhe nga njohja e veprës së tyre mësohet historia”, ka shkruar Kurti. /Kosovatimes/
