Policia e Kosovës ka bërë të ditur se sot ka gjetur armë, pajisje për prodhimin e kriptovalutave dhe pajisje tjera të dyshimta në rrugën “Kollashini” në Mitrovicë të Veriut.
Sipas njoftimit të policisë, pas pranimit të një informate mbi dyshimet se në një lokacion ka mjete të dyshuara, njësitet policore kanë ndërmarrë veprimet e menjëhershme, ku kanë kryer një kontroll në rrugën “Kollashini”.
Kontrolli është realizuar në një shtëpi dhe në objektet përcjellëse të saj.
“Dëshmitë e gjetuar dhe të konfiskuar janë një armë e gjatë (pushkë ajrore), pesë kartela grafike për prodhimin e kriptovalutave me pajisje përcjellëse, dyzet e dy minera për prodhim të kriptovalutave me pajisje përcjellëse, një shtëpizë e kompjuterit, një karikator i revoles, katërmbëdhjetë fishekë të revoles kalibri 9 mm, një radiolidhje, një kamerë vëzhgimi, një divijar, një vulë metalike dhe një letërnjoftim”, thuhet në njoftimin e policisë.
Policia thotë se aparatet për prodhimin e kriptovalutave do t’i dorëzohen Doganës së Kosovës.
“Në vendin e ngjarjes nuk është hasur ndonjë person i dyshuar, mirëpo është identifikuar një person dhe i cili është me interes për policinë që të intervistohet”, thuhet tutje në njoftim.
Në lidhje me rastin është njoftuar Prokurori i Shtetit i cili ka urdhëruar inicimin e rastit ‘’Mbajtja në pronësi, kontroll ose posedim i pa autorizuar të armëve’’.
Duke falënderuar qytetarët për bashkëpunimin, policia thekson se vazhdon të mbetet e përkushtuar për ofrim të shërbimeve ndaj të gjithë komunitetit pa dallim.
