Libri padyshim është një kulturë. Se sa është interesimi i të rinjve për të lexuar, e kuptojmë nga hulumtime që janë bërë kohë pas kohe. Sipas statistikave të një hulumtimi të Organizatës ETEA të vitit 2023, diku rreth 55% e popullatës te të gjitha grupmoshat nuk i dinë tre tituj librash që i kanë lexuar gjatë një viti ose gjatë gjithë jetës së tyre. Kjo, pak a shumë, tregon situatën e cila është alarmante për sa i përket leximit të librit.
Sipas statistikave, të rinjtë kosovarë nuk është që janë të dhënë pas librit. Por, sipas këtyre statistikave, të rinjtë e grupmoshave 15-19 vjeç dhe studentët në fillim të studimeve qëndrojnë pak më mirë me lexim krahas grupmoshave të tjera kur flasim në nivel të përgjithshëm të lexuesve.
“Nëse bëjmë krahasimin, kjo është pak a shumë situata çka na tregon edhe frekuentimin e bibliotekave publike, pra kryesisht janë nxënësit e shkollave të mesme klasat 9-10 dhe studentët baqelor kryesisht në afate provimesh”, tha Agon Ahmeti nga organizata ETEA.
Sa u përket të interesuarve për leximin e librave në Bibliotekën Kombëtare, interesimi është në nivel, por numri i të interesuarve është koherent gjatë gjithë vitit.
“Gjenerata M, e cila e frekuenton Bibliotekën Kombëtare janë studentët të cilët vijnë, po ashtu kemi prej grupmoshave të ndryshme që vijnë për hulumtime të ndryshme akademike e shkencore. Zakonisht janë grupmoshat më të vjetra ose personat të cilët janë edhe në pension të cilët vijnë të bëjnë hulumtime të ndryshme qoftë për arsye personale apo edhe shkencore”, tha Blerina Mulliqi, zyrtare për Bibliotekë.
E Muhamedin Hyseni, student i mjekësisë thotë se në bibliotekë ka filluar të vijë vitin e parë. “Kam filluar prej afatit të parë të janarit të vitit të kaluar. Studioj për provime këtu, është vend shumë i qetë, nxehtë dhe shpresoj që të kalojë sa më mirë”, tha ai.
Edhe Blerta Ibrahimi, studente e mjekësisë thotë se është e kënaqur me atë që ofron biblioteka.
“Është vend shumë i mirë, ka hapësira për të përsëritur, ka hapësira të qeta, mund ta gjesh shumë lehtë veten këtu”, tha ajo.
Ndërkaq, nga organizata ETEA vlerësohet se ka dallim të leximit të librit klasik me atë digjital.
