Të dyshuarit ishin të përfshirë në marrjen dhe shitjen e kokainës në të gjithë BE-në, si dhe në pastrim parash.
Hetimi i nisur në qershor 2022 zbuloi këtë rrjet të trafikut të drogës. Anëtarë të grupit kriminal janë shtetas të Shqipërisë, Bullgarisë, Kolumbisë dhe Spanjës.
Dyshohet se ata transportonin sasi të mëdha kokaine drejt Europës.
Secili prej tyre mori role të ndryshme brenda zinxhirit logjistik.
Shtetasit kolumbianë trajtonin dërgesat nga Kolumbia në Evropë, ndërsa shtetas bullgarë, kolumbianë dhe spanjollë mbikëqyrnin marrjen dhe shpërndarjen e mëtejshme të drogës.
Disa nga anëtarët e grupit do të fshiheshin në një kontejner për të hyrë me sukses në port dhe, me ndihmën e punëtorëve të korruptuar, për të nxjerrë kokainën gjatë natës.
Anëtarë të tjerë shqiptarë të grupit të krimit, me qendër në Dubai, vepruan si investitorë – duke siguruar burimet financiare të nevojshme për të paguar prodhuesin për dërgesat nga Kolumbia.
Inteligjenca tregon se rrjeti kriminal kishte kapacitet për të marrë deri në një ton kokainë në javë. Dërgesat bëheshin me kontejnerë ajror, mallrash dhe detarë. Në tetor 2024, autoritetet në Panama sekuestruan 4.1 ton kokainë me destinacion Spanjën, e cila është e lidhur me këtë grup.
Në aksionin që u zhvillua nga dhjetori 2024 deri në janar 2025, në Spanjë u arrestuan 22 persona.
Janë konfiskuar një ton kokainë dhe pesë kilogramë kokainë rozë, 35 automjete, mes të cilëve tetë makina luksoze, vlera e të cilave llogaritet në 2.5 milionë euro.
Janë marrë ora dhe bizhuteri luksoze në vlerë prej 1.5 milionë euro dhe 6.5 milionë euro cash.
Gjithashtu, janë konfiskuar 48 armë dhe janë bllokuar 53 llogari bankare.
