Shumë qendra për ofrimin e shërbimeve për personat në nevojë në Kosovë, rrezikojnë të mbyllen si pasojë e mungesës së financimit institucional. Personat të cilët marrin shërbime në këto qendra, po vlerësojnë së këto shërbime janë jetike për shëndetin e tyre. Drejtues të këtyre qendrave kanë bërë të ditur se fondet që marrin nga projektet e ndryshme janë shumë të vogla dhe afatshkurta.
Në Kosovë, ekzistojnë qendra të ndryshme që ofrojnë shërbime për personat në nevojë, duke përfshirë qendra të financuara nga shteti, organizata joqeveritare dhe institucione private.
Këto qendra ofrojnë shërbime për kategori të ndryshme si fëmijë, të moshuar, persona me aftësi të kufizuara, dhe grupe të margjinalizuara, rrezikojnë të mbyllen edhe përkundër që janë jetike për ta.
Qendresa Aliu, e cila aktualisht merr shërbime në Shoqatën “Hendifer”, në Ferizaj, i tha Radio Kosovës se shërbimet që i merr në këtë qendër, janë të domosdoshme.
“Shërbimet që i marrim këtu, nuk kemi mundësi t’i marrim diku tjetër. Këtu është psikologja si dhe për çka do që kam nevojë është edhe infermierja. Po ashtu, për çka do që kam nevojë vijnë të shpija m’i ofrojnë shërbimet”, thotë Aliu
Në këtë qendër vetëm gjatë një jave marrin shërbime afër 180 persona me aftësi të kufizuara. Nëna e një fëmije, i cili ka ngecje zhvillimore, i tha Radio Kosovës se këto shërbime janë shumë të rëndësishme për zhvillimin e fëmijës së saj.
“Shërbimet në këtë qendër që i marrin fëmijët me probleme zhvillimore janë shumë të rëndësishme, për shkak se këto seanca u ndihmojnë fëmijëve të arrijnë zhvillim. Këto shërbime vetëm për një javë një familjeje nëse i merr diku tjetër i kushton 150 euro, ndërsa këtu i marrim pa pagesë”, thotë një prime.
Përfaqësuesja e Shoqatës “Hendifer”, Fazile Bungu, bënë të ditur për Radio Kosovën se shërbimet që ofrojnë janë në baza vullnetare. Ajo shton se fondet që kanë marrë nga Ministria e Drejtësisë dhe ajo e Kulturës kanë qenë minimale.
“ Në pamundësi që t’i mbulojmë nevojat e të gjithë anëtarëve të shoqatës i kemi zgjedhur disa raste sociale. 80 për qind të shërbimeve jepen në baza vullnetare. Edhe pse e kemi pasur një projekt nga Ministria e Drejtësisë dhe ajo e Kulturës, terapitë prapë janë bërë në baza vullnetare, pasi buxheti që kemi marrë nga këto ministri, ka qenë minimal”, thotë Bungu
Edhe, drejtori i HANDIKOS-it, Afrim Maliqi, i tha Radio Kosovës se përkrahja e cila aktualisht vjen nga projektet e ndryshme, është shumë e vogël dhe afatshkurtër.
“Projektet dhe shumat të cilat ne përfitojmë janë tejet të vogla, janë minimale dhe periudha kohë është jashtëzakonisht e shkurtër. Nuk qëndrojmë fare mirë, jo vetëm në Prishtinë por edhe në gjithë Kosovën. Institucionet e nivelit qendror dhe lokal duhet të gjejnë mënyra që t’i mbështesin këto shërbime, pasi janë qenësore për personat më aftësi të kufizuara. Këto shërbime duhet të mbështeten direkt nga shteti, pasi këta persona janë qytetarë të këtij shteti dhe se për këtë arsye institucionet janë përgjegjëse e jo organizatat dhe jo ne si organizata”, thotë Maliqi.
Se qendrat për ofrimin e shërbimeve për personat në nevojë nuk janë në gjendje të mirë dhe duhet të jenë nën ombrellën e shtetit, e thotë edhe drejtoresha e Koalicionit për Mbrojtjen e Fëmijëve, Donjeta Kelmendi.
“Situata në vitin 2024 ka qenë një situatë krize dhe kolapsi. Ne kërkojmë nga niveli lokal dhe qendror që të ndërhyhet në mënyrë që fëmijët të cilët janë të cenueshëm, pa përkujdesje prindërore, viktima të dhunës dhe fëmijët me aftësi të kufizuara të mos mbesin pa shërbime. Në vitin 2024 kemi pasur mbyllje dhe reduktim të shumë shërbimeve të cilat kanë qenë duke funksionuar me këto vështirësi.”
Sfidat me të cilat përballen qendrat për ofrimin e shërbimeve për personat në nevojë, ndikojnë në efikasitetin dhe cilësinë e shërbimeve që ofrojnë.
