Kryeprokurori Isufaj dhe Shefi i Misionit të EULEX-it kanë diskutuar lidhur me çështjet që kanë të bëjnë me forcimin e sundimit të ligjit në Republikën e Kosovës.
Këto diskutime janë bërë në një takim pune ku Kryeprokurori i Prokurorisë Speciale të Republikës së Kosovës, Blerim Isufaj ka pritur Shefin e Misionit të EULEX-it, Giovanni Pietro Barbano, si dhe bashkëpunëtorët e tij, njofton Zyra e Prokurorit të Shtetit përmes një komunikate për media.
Në njoftim thuhet se konkretisht në këtë takim është diskutuar për thellimin e bashkëpunimit në mes Prokurorisë Speciale dhe Misionit EULEX, si dhe për mbështetjen e këtij Misioni në ruajtën e pavarësisë institucionale.
Nga ana tjetër Shefi i EULEX-it, Giovanni Pietro Barbano, duke e vlerësuar punën e Prokurorisë Speciale, ka theksuar se institucioni që ai drejton brenda mandatit të tij do të vazhdojë mbështetjen për Prokurorinë Speciale në promovimin dhe forcimin e sundimit të ligjit.
Me këtë rast të dy bashkëbiseduesit nënshkruan edhe marrëveshje për pranimin e një donacioni, konkretisht një veture dhuruar nga Misioni EULEX, për Prokurorinë Speciale të Republikës së Kosovës.
Kurse, Kryeprokurori Isufaj ka falënderuar Misionin ELUEX për dhurimin e veturës, e cila do të përdoret për nevojat e Prokurorisë Speciale, duke vlerësuar rolin, përkushtimin dhe mbështetjen e Misionit të BE-së për Sundimin e Ligjit në Kosovë dhënë në vazhdimësi për institucionin e Prokurorisë Speciale, si dhe ka shprehur gatishmërinë e tij për thellimin e bashkëpunimit edhe në të ardhmen me qëllim të arritjes së sukseseve të përbashkëta.
