Kryeministri i Kosovës, Albin Kurti, ka vizituar fabrikën e mobileve “Te Naseri” në Therandë, një ndërmarrje që po shënon suksese të mëdha në prodhim dhe eksport. Fabrika numëron 397 punëtorë, shumica prej të cilëve gra, duke e bërë atë një shembull të fuqizimit ekonomik dhe përfshirjes gjinore në vend.
Gjatë vizitës, Kryeministri u njoh nga afër me procesin e prodhimit dhe arritjet e ndërmarrjes, ku 70% e produkteve eksportohen në Gjermani dhe Zvicër. Vitin e kaluar, vlera e eksportit të mobileve nga kjo fabrikë arriti në 12 milionë euro, një sukses i jashtëzakonshëm për industrinë vendase.
Ndër të tjera, Kurti përmendi se menaxherja kryesore e fabrikës udhëton çdo ditë nga Prishtina, ndërsa pagat në këtë ndërmarrje janë ndër më konkurrueset në rajon, duke përfshirë një punëtor me pagë prej 2500 eurosh.
Në fund të vizitës, një punëtore e quajtur Pranvera i dhuroi Kryeministrit një pllakë përkujtimore si kujtim të kësaj vizite. “Faleminderit për këtë mikpritje, një vizitë që më gëzoi shumë,” u shpreh Kurti. /Kosovatimes/
