Kryetari i Lidhjes Demokratike të Kosovës (LDK), Lumir Abdixhiku, ka vizituar sot Kubix Gaming Center në Prishtinë, ku është takuar me komunitetin e lojtarëve të lojërave elektronike (E-Sports). Gjatë kësaj vizite, Abdixhiku njoftoi planin e LDK-së për ndërtimin e një Gaming Hall modern me 2000 ulëse, si pjesë e Qendrës Kombëtare të Sportit, me një investim prej 8 milionë eurosh.
Ky projekt synon të krijojë kushte optimale për organizimin e turneve të nivelit ndërkombëtar dhe të mbështesë komunitetin e ‘gamerave’ në Kosovë, i cili ka marrë hov të madh pas suksesit të ekipit Bad News Eagles në arenën globale të lojës Counter-Strike.
“Rinisë sonë i duhet vetëm përkrahje dhe hapje e mundësive. Ata e dëshmojnë vetën në arenën ndërkombëtare në çdo fushë,” tha Abdixhiku, duke theksuar se me qeverinë e tij, ky sektor do të ketë mbështetjen e duhur.
Nëse LDK fiton zgjedhjet më 9 shkurt, Gaming Hall-i modern do të jetë pjesë e strategjisë së partisë për të avancuar sportin dhe kulturën digjitale në Kosovë. /Kosovatimes/
