Faturat e janarit shumë qytetarëve u kanë ardhur të larta, por ka edhe të tjerë që e pranojnë se kanë konsumuar më shumë energji elektrike se sa në dhjetor. Nga ana tjetër, Kompania Kosovare për Furnizim me Energji Elektrike thekson se vetëm 18% e konsumatorëve kanë pranuar fatura mbi 100 euro dhe sipas tyre nuk ka pasur rritje tarifash. Sipas KESCO-s, rritja e konsumit ka ndikuar edhe në nevojën për më shumë import të energjisë.
Faturat e energjisë elektrike për muajin janar i kanë zënë në befasi shumë qytetarë. Ata ankohen se fatura e muajit janar është shumë më e lartë se ajo e muajit paraprak, ani pse thonë se kanë shpenzuar njëjtë energji elektrike.
“108 euro. Po çfarë të përballueshme këto, katastrofë është. E përfundova pagesën, se nëse vonohesh pak ta këpusin. Këta e kanë bë me do tarifa mbi 800 kWh, tash ajo po dyfishohet.Tash në kohën e dimrit nuk ka familje që është nën 800 kWh. E këto fatura që po vijnë na s’po dimë as me i kalkulu qysh duhet”, tha një qytetar i anketuar.
Por, ka të tjerë që thonë se faturat janë të arsyeshme, sepse kanë shpenzuar më shumë këtë muaj.
“Më ka ardhë 185 euro. E kemi shpenzuar dhe duhet me e pagu…Besoj se kemi shpenzuar më tepër se muajin e kaluar, dhjetor”, theksoi qytetari tjetër.
Nga Kompania Kosovare për Furnizim me Energji Elektrike kanë bërë të ditur se vetëm një përqindje e vogël e qytetarëve kanë pranuar fatura mbi 100 euro në këtë periudhë.
“Sa u përket tarifave të muajit janar vlen të theksohet se nuk ka pasur rritje të tarifave, ato janë miratuar vitin e kaluar nga ZRRE dhe si të tilla obligohemi me i zbatu. Por nëse flasim në aspektin e faturimit atëherë vetëm 18% e konsumatorëve në këtë periudhë kanë pranuar faturë më shumë se 100 euro, ndërsa 82% prej tyre kanë pranuar fatura nën 100 euro. Pra po flasim për një përqindje shumë të vogël të konsumatorëve që kanë pranuar fatura më të larta”, theksoi Margarita Rashiti, zëdhënëse për media në KESCO.
Nga KESCO kanë bërë të ditur se me rritjen e konsumit është rritur edhe importi i energjisë elektrike.
