Selatin Kaçaniku nga organizata “Konsumatori” ka paralajmëruar se edhe Kosova mund të bëhet pjesë e fushatës për bojkotimin e marketeve që abuzojnë me çmimet, një iniciativë që ka filluar në Kroaci dhe është përhapur në Bosnje e Hercegovinë, Mal të Zi dhe së shpejti pritet të nisë edhe në Maqedoninë e Veriut.
“Ajo që po ndodh është gjëja e pritur dhe e duhur. Po ndodh aty ku niveli i patriotizmit ekonomik është më i lartë dhe, për mua, është befasuese që kjo po vazhdon edhe në Bosnje e Hercegovinë, në Mal të Zi, dhe tash jemi në radhë ne. Maqedonia më duket e gatshme, vetëm sa nuk e ka shpallur, dhe me këtë inercion pres që e njëjta t’i ndodhë edhe Shqipërisë,” tha Kaçaniku në emisionin “Pasdite” në RTK.
Ai shtoi se ka ofruar bashkëpunim me kolegët në Kroaci për ta mbështetur këtë iniciativë edhe në Kosovë.
“U kam uruar sukses dhe u jam afruar për bashkëpunim, që do të thotë se duke i përkrahur ata, i përkrah edhe bojkotimet eventuale te ne, nëse deri më 10 shkurt nuk kemi lëvizje mes partishë, mes biznesesh, në veçanti nga Shoqata e shitësve me pakicë, atëherë ne duhet të veprojmë sepse duhet të vetëmbrohemi,” deklaroi ai.
Në Kroaci, bojkoti që nisi të premten ndaj dyqaneve, po konsiderohet i suksesshëm falë unitetit të konsumatorëve dhe blerësve kroatë. Platforma e konsumatorëve “Alo Inspektor”, e cila nisi iniciativën për bojkot, publikoi në rrjetet sociale foto të dyqaneve bosh. Pas shembullit të Kroacisë, Bosnjë dhe Hercegovinës dhe Malit të Zi, edhe në Maqedoninë e Veriut është paralajmëruar bojkot i dyqaneve, në shenjë revolte për çmimet e larta të produkteve.
