Koalicioni AAK-Nisma dhe partnerët e tjerë vazhduan fushatën e tyre në Klinë, ku kandidati për Kryeministër Ramush Haradinaj, së bashku me Fatmir Limajn dhe Zenun Elezajn, prezantuan programin e tyre për zhvillimin ekonomik dhe përmirësimin e kushteve të jetesës për qytetarët
Kandidati për Kryeministër nga koalicioni AAK-Nisma, Ramush Haradinaj, gjatë një tubimi me qytetarët e komunës së Klinës, tha se një nga hapat kryesorë të qeverisjes së tij do të jetë rikthimi i ligjit për investime strategjike, si një mundësi e favorshme për zhvillimin ekonomik.
“Klina do ta ketë rrugën tranzitore, që do e lidh me Istogun dhe Skenderajn. Klina do të lidhet me Autostradën e Dukagjinit. Nuk do të ketë rritje të çmimit të energjisë – çmimi do të ulet për 20%. Fond për bizneset e reja – të rinjtë do të përfitojnë grante pa kthim. Nuk do të ketë pagë nën 1000, e as pension nën 500 euro. Nuk do të ketë student pa bursë. Do të trefishohen subvencionet për bujqësi. Ligji për investime strategjike do t’i bëjë bizneset partnere me shtetin”, premtoi Haradinaj.
Partneri i tij nga Nisma, Fatmir Limaj, theksoi se koalicioni i tyre përbëhet nga “historia dhe vlerat më të mira që ka ky vend”.
Kryetari i Klinës, gjithashtu kandidat për deputet nga AAK-ja, Zenun Elezaj, tha se me qeverinë Haradinaj, Kosova do të rikthejë partneritetin me aleatët.
Në kuadër të planit investues, ky koalicion ka premtuar rritje pagash, investime në energjinë me gaz dhe zhvillim ekonomik e infrastrukturor.
