Federata e Pingpongut e Kosovës ka mbajtur Kuvendin e rregullt dhe atë zgjedhor.
Në Kuvend morën pjesë 43 delegatë nga klubet, prej të cilëve 43 kishin të drejtë vote, gjithashtu të pranishëm ishin edhe përfaqësues nga Ministria e Kulturës, Rinisë dhe Sportit dhe Komitetit Olimpik të Kosovës.
Pas fjalëve përshëndetëse, Kuvendi filloi me shqyrtimin e pikave të rendit të ditës dhe shpalosjen e programeve nga kandidatët për Kryetar.
Pas numërimit dhe verifikimit të votave nga Komisioni i zgjedhur, Jeton Oruçi u shpall Kryetar me 23 vota ndërsa kundërkandidati i tij Nehat Çitaku mori 20 vota.
Pas shpalljes së rezultatit, kryetari i ri, Jeton Oruçi u shpreh falënderues për besimin dhe përkrahjen ndaj tij dhe u zotua për mbajtjen e premtimeve të dhëna.
Ju kujtojmë se Kryetari Jeton Oruçi është një pingpongist me përvojë shumëvjeçare ku si sportist i Klubit të Pingpongut Dardania (Prishtinë), ka fituar shumë tituj si në garat ekipore ashtu edhe në ato individuale, duke qenë Kampion në të gjitha disiplinat (individual, çifte dhe çifte të përziera) në vitin 2002 si dhe ka fituar tituj të ndryshëm në gara të seniorëve ndër vite.
Në vitet 2020-2024, ai ka shërbyer si nën-kryetar i parë i Federatës së Pingpongut të Kosovës (FPPK). Në këtë rol, ai ka udhëhequr marrëdhëniet e jashtme me organizata sportive vendore dhe ndërkombëtare dhe ka kryesuar Komisionin për aktet normative në FPPK si dhe ka qenë i përfshirë në rishikimin e kornizës ligjore të sportit në Kosovë i cili ka kulmuar me Ligjin e ri për Sport.
Që nga viti 2020, ai është anëtar i Këshillit të Arbitrazhit Sportiv në Komitetin Olimpik të Kosovës. Njëkohësisht, ai është edhe anëtar i Bordit të Apelit në Unionin Evropian të Pingpongut (ETTU).
Jeton Oruçi është jurist, i diplomuar në Universitetin e Prishtinës, dhe ka përfunduar studimet master në Institutin Rochester të Teknologjisë (RIT) – Universiteti Amerikan i Kosovës, duke mbajtur titullin Master i Shkencave me fokus në Politikat Publike. Aktualisht, ai punon si Këshilltar Ligjor dhe Institucional në organizatën gjermane giz Deutsche Gesellschaft für Internationale Zusammenarbeit (GIZ) GmbH. /Kosovatimes/
