Zëdhënësi i Partisë Demokratike të Kosovës, Blerand Stavileci nëpërmjet një konference për media ka bërë thirrje për votimin e këtij subjekti politik në zgjedhjet e 9 shkurtit.
Stavileci ka thënë se deri më tani PDK ka zhvilluar mbi 2 mijë takime, teksa për kandidatin për kryeministër nga kjo parti, Bedri Hamza, ka thënë se qytetarët e njohin dhe dinë për veprimtarinë e tij.
“Qytetarët duan punë dhe rezultate. Zotime të qëndrueshme dhe vepra konkrete. Ata e dinë kush është Bedri Hamza. Fjala e tij për ta ka peshë, sepse çdo premtim që ai bën është një angazhim që e çon deri në fund. Është një garanci ligjore dhe morale. E kanë parë në punë, e kanë parë të ndërtojë, të zhvillojë, të transformojë. Prandaj, qytetarët sot po e mbështesin fuqishëm vizionin për një Kosovë ma të mirë”, theksoi ai.
Sipas Stavilecit, Kosova ka nevojë për ekonomi të fortë, për arsimim, shëndetësi, siguri e drejtësi më të mirë.
“Në këtë frymë, kemi një mesazh të qartë për qytetarët e Kosovës: Nuk jemi këtu për të përçarë, por për të bashkuar! Nuk jemi këtu për të premtuar, por për të realizuar! Nuk jemi këtu për një fitore të thjeshtë, por për një të ardhme ma të mirë për Kosovën!”, shtoi ai.
