Kandidati për kryeministër i Lidhjes Demokratike të Kosovës, Lumir Abdixhiku, ka mbajtur tubim elektoral në Gjilan. Ai ka thënë se është koha për ndryshimin që, sipas tij, vjen vetëm me LDK-në në qeverisje.
“Ëndrra e heronjve na qëndron si kushtrim për përkushtim e për bashkim. Ne, na takon ta bëjmë edhe rrugën drejt integrimit euroatlantik të Kosovës. Kosova, shtet i pavarur e sovran, i anëtarësuar në NATO e BE, me miqësi të përhershme me Shtetet e Bashkuara të Amerikës, ishte misioni ynë dje, është misioni ynë sot, do të jetë misioni ynë nesër. Pra, LDK e njëjtë, besimtarë të njëjtë, rugovistë njëherë, rugovistë gjithherë,” u tha mbështetësve në Gjilan, Abdixhiku.
Ai tha se qeveria e ardhshme vjen me projekte të mëdha që transformojnë qytetet.
“Me 9 shkurt vij me investime që kësaj ane i japin dinjitetin. Me 9 shkurt, vij me autostradën e Anamoravës plot 170 milion euro, për rrugën madhe kombëtare. Me 9 shkurt, vij edhe me stadiumin e Gjilanit. Po, ky qytet sportiv, po, ky qytet kampion, po, kjo anë e jona do të ketë stadium modern e investim 12 milion euro nga qeveria qendrore,” tha tutje ai.
Abdixhiku tha se në shëndetësi do të investohen mbi 10 milion euro për spitalin e Gjilanit, për ta shndërruar, siç tha, në qendër moderne të ekselencës, që sipas tij, do të ngrisë nivelin e kujdesit shëndetësor.
Tutje, ai para gjilanasve tha se do të jetë partner edhe i bizneseve, derisa ripërsëriti premtimin për rritje pagash e pensionesh.
“Do të rriten pagat e shërbyesve publik që në javën e parë me koeficient 150, nga 200 euro më shumë për të gjithë, 80 mijë shërbyesve publik,” tha ai.
Tha se do të rriten pensionet, sikur edhe që do të jenë shërbimet shëndetësore falas për pensionistë.
Ndërsa, Lutfi Haziri, kandidat për deputet, tha se LDK-ja është parti me traditë e me të ardhme evropiane.
Ai tha se pjesëmarrja qytetare është konfirmim për besimin në programin dhe listën e LDK-së.
