Kandidati për kryeministër nga koalicioni AAK e Nisma me partnerët, Ramush Haradinaj, ka prezantuar paketën e reformave për gastronominë, i cili është plan me gjashtë pika.
Sipas njoftimit nga ky koalicion, në një takim me përfaqësues të gastronomisë, u prezantuan masa konkrete që synojnë lehtësimin e barrës fiskale dhe përmirësimin e kushteve të operimit për bizneset e këtij sektori.
“Gastronomia është një shtyllë vitale e ekonomisë sonë dhe meriton mbështetje të menjëhershme,” u shpreh Haradinaj, duke prezantuar planin që parasheh uljen e TVSH-së në 8% për katër vitet e ardhshme.
Kjo masë shoqërohet me reduktimin e tarifave në produktet bazë dhe uljen e normave tatimore në paga dhe fitim nga 10% në 9%.
Lideri i koalicionit për Kosovën Fituese prezantoi gjithashtu sistemin e pagesave tatimore me këste, si dhe ndryshime në Ligjin për Zhurma që do të sigurojnë, sipas tyre, mbrojtje më të mirë për bizneset. Vëmendje e veçantë i është kushtuar edhe rregullimit të çështjes së duhanit përmes sistemit FUMAR, që parasheh zona të ndara dhe tarifa të përcaktuara qartë.
“Këto reforma do të sjellin më shumë formalitet në sektor, do të përmirësojnë kushtet e punës dhe do të krijojnë siguri juridike për investime,” theksoi Haradinaj, duke shtuar se masat e propozuara do të rezultojnë në rritje të të ardhurave për shtetin, duke krijuar kështu një situatë fitim-fitim për të gjithë aktorët e përfshirë.
