Partia Demokratike e Kosovës ka mbajtur tubim elektoral në qytetin e Prizrenit. Atje Bedri Hamza kandidat i PDK-së për kryeministër u zotua se Kosovën do të bëjë më mirë.
Hamza premtoi të ardhme të sigurt, rritje pagash e pensionesh, arsim cilësor, sigurime shëndetësore, barëra falas, ndihmë për bujqit e infrastrukture moderne.
“Në muajt e parë do t’i rrisim pagat për sektorin publik 50 përqind, pensionet bazike 70 përqind, kategoritë e dala nga lufta jo vetëm rritje por do të kenë mundësi të punojnë në sektorin privat pa u penguar. Këto rritje do ta forcojnë fuqinë blerëse dhe do ta çojnë përpara ekonominë. Do të reformojmë sistemin e tatimeve, do të lehtësojmë bizneset, do të japim grante e subvencione. Në infrastrukturë rrugë të reja e hekurudhë moderne. Reformim të sistemit arsimor të përshtatshëm për shekullin 21. Në shëndetësi do të ofrojmë sigurimet shëndetësore, barërat esenciale falas, pasi shëndetësia nuk është luks por e drejtë e secilit. Do të bashkëpunojmë me komunat për të përmirësuar shërbimet publike”, tha Hamza.
Ai prizrenasve u premtoi rimëkëmbje të sheshit të Shatërvanit, rregullimin e unazës së qytetit, lidhjen e autostradës dhe hapjen e rrugës së re tranzitore, si dhe rezerva të mjaftueshme të ujit, që qyteti të mos ketë më probleme me ujë.
Ndërkaq, Memli Krasniqi kryetar i PDK-së në Prizren e kërkoi besën e qytetarëve për siç tha ai, besën për Kosovën, besën për ma mirë e për Bedri Hamzën kryeministër.
“Njeriun e gjithë Kosovës, një profesionist i dëshmuar, një patriot që gjithmonë ka punuar për të mirën e vendit, një familjar që i di hallet e secilës shtëpi e mbi të gjitha një lider që e mban fjalën. Lider nuk është ai që ndan por ai që bashkon, lider është ai që jo vetën premton por ai që premton e realizon, ai që nuk dorëzohet e justifikohet por që gjen rrugë përpara. Bedriu e di që ekonomia nuk zhvillohet me fjalë por me punë, ai e di se vendimet e mëdha kërkojnë njerëz të guximshëm e dinjitetshëm siç është ai vetë. Bedri Hamza do ta riktheje dinjitetin. Me Bedri Hamzën fiton Kosova, me PDK Kosova ecë përpara”, tha Krasniqi.
PDK në këtë tubim prezantoi edhe kandidatët për deputetë nga Prizreni.
