Koalicioni për Familjen ka mbajtur një tubim elektoral në Viti, ku udhëheqësit e këtij koalicioni prezantuan angazhimet e tyre për mbështetje dhe ruajtjen e integritetit dhe dinjitetit të familjes.
Udhëheqësi i Koalicionit për Familjen, Erman Rrahmani, gjatë një tubimi elektoral në Viti, u zotua për ruajtjen e integritetit dhe dinjitetit të familjes.
“Koalicioni do të jetë garant i të ardhmes dhe përfaqësues i juaj duke ruajtur integritetin e familjes. Familja është ajo që na obligon për një rreshtim të dinjitetshëm,” tha ai.
Ferid Agani nga ky koalicion, prezantoi programin që ofron mbështetje financiare për nënat. “Në programin tonë parashihet që fëmijët të shtohen dhe prindërit të jenë të suksesshëm. Për këtë, prindërit do të mbështeten me masa konkrete. Çdo nënë e re për fëmijën e parë do të mbështetet me 500 euro për dy vite rresht, për të dytin 750 euro dhe për më shumë se kaq, nga 1000 euro,” tha Agani.
Kandidati për deputet nga ky koalicion, Fatmir Smaji, foli për rolin e familjes për brezat e ardhshëm. “Ne u organizuam me konceptin e pastër politik për familjen dhe vetëm për familjen. Kjo sepse ua kemi borxh atyre që na rritën dhe na edukuan, dhe ja kemi borxh brezave që vijnë pas nesh,” theksoi ai.
Edhe kandidatët e tjerë për deputetë dhe mysafirët e ftuar nga ky koalicion, folën për vizionin dhe rëndësinë e familjes.
