Lidhja Demokratike e Kosovës (LDK) mbajti një tubim elektoral në Podujevë, ku kandidati për kryeministër, Lumir Abdixhiku, theksoi angazhimin e tij për zhvillimin e rajonit dhe mbështetje për qytetarët e kësaj komune. Me këtë rast, ai foli për projektet kyçe të LDK-së, duke përfshirë ndërtimin e infrastrukturës dhe përmirësimin e shëndetësisë.
Kandidati i LDK-së për kryeministër, Lumir Abdixhiku, kërkoi votën e llapjanëve për zgjedhjet e 9 shkurtit duke thënë se Llapi ka dhënë shumë për Kosovën. Ai përmendi figura të rëndësishme historike, si ish-presidenti Ibrahim Rugova dhe veprimtarët Xhemail Mustafa e Enver Maloku dhe theksoi se LDK po ringrihet në Llap.
Para qytetaeëve ai i përmendi disa nga planet dhe investimet që i ka ndërmend t’i bëjë.
“Është koha që të flasim bashkë për vendimet e mëdha për vendin. Do të keni përkrahjen time. Do të përfundojmë magjistralen e stërzgjatur, e me prioritet absolut si interes nacional të vendit. Do të jem vet në terren çdo ditë e natë për t’i përfunduar punimet në kohë rekorde për ju Llap. Do të rikthejmë Spitalin e Podujevës atë që ua hoqën këta, sepse e meritoni këtë spital. Do të ndërtojmë gjithandej në Llap”, tha Abdixhiku.
Tutje ai tha se zgjedhjet do të ndikojnë në të ardhmen e Kosovës si një shtet në zhvillim dhe pjesë e proceseve globale.
“Ju qytetarë të Podujevës, duhet ta kuptoni peshën e zgjedhjes që keni në duar tuaja. Sepse, këto zgjedhje, nuk bëhen vetëm për të përcaktuar një kryeministër të ardhshëm të Kosovës, por, para së gjithash, bëhen për të përcaktuar të ardhmen e Kosovës. Si një shtet në zhvillim, me njerëz që bëjnë jetën këtu, si një shtet të hapur në procesin e rrjedhave botërore”, u shpreh Abdixhiku.
Kryetari i Degës së LDK-së në Podujevë, Ekrem Hyseni, u shpreh i bindur për fitoren e LDK-së në zgjedhjet e së dielës, duke theksuar se ringritja dhe rikthimi i LDK-së ka rrënjët e tij në Llap. “Sa i fortë është Llapi dhe sa e fortë është LDK-ja, po flet sonte”, tha mes tjerash ai.
LDK prezantoi gjithashtu kandidatët e saj për deputetë nga qyteti i Podujevës.
