Kryetari i Prishtinës, Përparim Rama, ka falënderuar qytetarët për pjesëmarrjen e tyre në zgjedhjet e fundit duke vlerësuar maturinë demokratike dhe qytetarinë e treguar gjatë procesit zgjedhor. Ai e cilësoi Prishtinën si zemrën e demokracisë dhe theksoi se kryeqyteti duhet të jetë një ndër prioritetet kryesore të qeverisë së re.
“Prishtina nuk është vetëm një qendër urbane, por zemra e funksionimit të shtetit, motori i zhvillimit ekonomik dhe imazhi ynë në botë. Ajo kërkon një program të qartë qeverisës dhe investime strategjike për t’u kthyer në një model të zhvillimit modern dhe europian,” tha Rama.
Ai përgëzoi partinë fituese dhe shprehu shpresën për formimin sa më të shpejtë të qeverisë së re, duke shtrirë dorën e bashkëpunimit institucional për të mirën e kryeqytetit dhe të Kosovës.
Një vlerësim të veçantë, Rama e dha për partitë opozitare, duke theksuar fushatën e tyre dinjitoze dhe të drejtë, si dhe për LDK-në dhe liderin e saj, Lumir Abdixhiku. Sipas tij, LDK ka zhvilluar një fushatë të bazuar në kulturën politike dhe vizionin për të ardhmen, duke e forcuar besimin në politikëbërjen e përgjegjshme.
“Kryeqyteti do të vazhdojë të jetë zëri i progresit, i zhvillimit dhe i një Kosove që ecën përpara me dinjitet dhe vizion,” përfundoi ai. /Kosovatimes/
