Të papranueshme i ka quajtur rrjeti i organizatave Demokracia në Veprim, vonesat në numërimin e votave të kandidatëve, që sipas tyre, dëmtojnë besimin në procesin zgjedhor.
Ky mision vendor për monitorimin e zgjedhjeve, thotë se dita elektorale u zhvillua në përgjithësi në një atmosferë të qetë dhe pa incidente serioze, megjithatë, sipas tyre, procesi u cenua nga dështimi i sistemit elektronik të KQZ-së për publikimin e rezultateve preliminare.
“Sipas legjislacionit në fuqi, në vendvotimet e rregullta, fillimisht numërohen vetëm votat për subjektet politike, ndërsa verifikimi i tyre dhe numërimi i votave për kandidatët e subjekteve politike duhet të nisë ditën pas zgjedhjeve”, thotë DnV-ja.
Andaj, sipas tyre, procesi i numërimit të votave për kandidatët duhej të kishte filluar dje në orën 08:00 të mëngjesit në 38 Qendrat Komunale të Numërimit.
“Megjithatë, për shkak të atyre që KQZ-ja i konsideron ‘probleme teknike dhe administrative’, ky proces ende nuk ka nisur deri në këtë moment. Vetëm sot, KQZ ka njoftuar se procesi do të fillojë në orën 16:00, por vetëm në katër komuna. Ky veprim është një improvizim që krijon përshtypjen se situata është nën kontroll, kur në fakt realiteti është ndryshe”, thonë ata.
Demokracia në Veprim i bën thirrje KQZ-së që pa vonesa dhe në mënyrë transparente të ndajë informacione për ecurinë e procesit të numërimit në QKN dhe pranimin e fletëvotimeve nga jashtë përmes postës.
Gjithashtu, kërkojnë që KQZ-ja të angazhohet me të gjitha kapacitetet e saj, në mënyrë që të mos tejkalohen afatet ligjore dhe të mos krijohen vonesa që mund të ndikojnë në certifikimin e rezultateve.
“Duke mos i ndarë informatat me kohë dhe në mënyrë transparente, KQZ do të mund të dëmtojnë besimin e qytetarëve në rezultatet e zgjedhjeve, gjë që është e papranueshme, sidomos pas një dite të zgjedhjeve demokratike”, thonë nga DnV-ja.
