SANTORINI u godit nga një tërmet i fortë dhe i cekët me magnitudë 5.3 ballë mbrëmë, tërmeti më i fortë që ka goditur ishullin grek gjatë aktivitetit sizmik të fundit në zonë. Tërmeti është ndjerë edhe në Athinë, dhe epiqendra ka qenë në thellësinë 17 kilometra, shkruan BBC .
Santorini ka përjetuar aktivitet sizmik që nga muaji i kaluar, me Laboratorin Sizmologjik të Universitetit të Athinës që regjistroi më shumë se 12,800 tërmete. Disa banorë patrullojnë zona të rrezikshme për të parandaluar turistët që të ngjiten në shkëmbinj dhe të bëjnë foto.
Për shkak të shpeshtësisë dhe fuqisë së tërmeteve, në shumë pjesë të Santorinit kanë ndodhur rrëshqitje dheu dhe ekspertët nuk kanë përjashtuar mundësinë e një tërmeti edhe më të fortë. Edhe pse sizmologët ishin optimistë se intensiteti i tërmetit do të fillonte të zvogëlohej, tani ata janë të shqetësuar se situata po përkeqësohet.
Gjendja e jashtëzakonshme në Santorini do të mbetet në fuqi deri më 3 mars, raporton BBC.
Braktisja masive e ishullit
Tërmetit të së dielës i kanë paraprirë tre tërmete më të vogla me magnitudë më të madhe se 4.0, ndërsa tre tërmete të mëngjesit të djeshëm kanë qenë gjithashtu më të fortë se 4.0. Inspektimet treguan se nuk pati dëme në ndërtesa në Santorini dhe Amorgos.
Nuk raportohet për të lënduar nga tërmetet, të cilët kanë arritur në mijëra që nga 26 janari, por më shumë se 11,000 njerëz janë larguar nga ishujt. Shkollat në Santorini, Amorgos dhe disa ishuj të tjerë do të qëndrojnë të mbyllura sot.
Një ekip i Njësisë Speciale të Reagimit ndaj Fatkeqësive është nisur nga Patras për në Amorgos me një mjet të posaçëm shpëtimi nga tërmeti dhe ekipet teknike pritet të inspektojnë rrjetin elektrik të ishullit.
Kostas Papazachos, një profesor i sizmologjisë në Universitetin Aristotele të Selanikut, i tha televizionit grek ERT se autoritetet duhet të presin që situata të zgjasë pjesën më të madhe të shkurtit. “Le të shpresojmë se do të shkojmë ngadalë drejt një de-përshkallëzimi gradual,” tha ai.
“Duhet të bëjmë durim dhe të shohim. Le të shpresojmë që në pak javë fenomeni të fillojë të dobësohet.”
Tërmeti më i fortë deri më tani ka qenë me magnitudë 5.2 ballë
Ai shtoi se nuk është përjashtuar plotësisht mundësia e një tërmeti më të madh. Ndërkohë, anija turistike Viking Star me 893 pasagjerë dhe 470 anëtarë të ekuipazhit u ankorua në portin e Soudës në Kretë mëngjesin e djeshëm. Ajo supozohej të ishte anija e parë e lundrimit të sezonit në Santorini, por ndryshoi itinerarin e saj për të shmangur turmat në teleferik gjatë aktivitetit sizmik, raporton BBC.
Tërmeti më i fortë i regjistruar gjatë këtij aktiviteti sizmik ishte me magnitudë 5.2 të enjten. Tërmetet me magnitudë 6 e lart konsiderohen të rëndë. Greqia është një nga vendet më aktive sizmike në Evropë, por shkencëtarët janë në mëdyshje nga “grumbullimet” aktuale të tërmeteve që nuk janë të lidhura me një tërmet më të madh.
Santorini ndodhet në të ashtuquajturin hark vullkanik helen, një zinxhir ishujsh të formuar nga shpërthimet vullkanike, por shpërthimi i fundit i madh ndodhi në vitet 1950. Autoritetet greke kanë deklaruar se tërmetet e fundit janë të lidhura me lëvizjen e pllakave tektonike dhe jo me aktivitetin vullkanik.
Shkencëtarët nuk mund të parashikojnë me saktësi kohën, madhësinë ose vendndodhjen e një tërmeti. Nga 26 janari deri më 8 shkurt 2025, Laboratori Sizmologjik i Universitetit të Athinës regjistroi më shumë se 12,800 tërmete në zonën Santorini-Amorgos, përfundon BBC.
