Një numër rekord gazetarësh u vranë në mbarë botën vitin e kaluar, njoftoi Komiteti për Mbrojtjen e Gazetarëve (CPJ), duke shtuar se Izraeli ishte përgjegjës për pothuajse 70 për qind të rasteve.
Të paktën 124 gazetarë në 18 vende humbën jetën në vitin 2024, viti më vdekjeprurës që kur komiteti filloi të gjurmonte numrat 30 vjet më parë, tha CPJ.
Ai fajësoi ushtrinë izraelite për vdekjen e 85 gazetarëve që raportonin nga Gaza dhe akuzoi Izraelin se po përpiqej të pengonte hetimet, duke transferuar përgjegjësinë te gazetarët dhe duke injoruar detyrimin e tij për të ndëshkuar përgjegjësit për vrasjet.
Ushtria izraelite po justifikohet
E pyetur për koment, ushtria izraelite u përgjigj se nuk kishte informacion të mjaftueshëm për incidentet dhe nuk mund t’i verifikonte ato.
“Ushtria izraelite kurrë nuk ka synuar dhe kurrë nuk do të synojë qëllimisht gazetarët”, tha ushtria.
Numri i gazetarëve të vrarë në 2024 është shumë më i lartë se në vitet e mëparshme, 102 në 2023 dhe 69 në 2022, sipas CPJ.
Rekordi i mëparshëm ishte viti 2007, kur 113 gazetarë humbën jetën, pothuajse gjysma në luftën në Irak.
Sudani dhe Pakistani janë të dytat në numrin e gazetarëve të vrarë në vitin 2024, tregojnë të dhënat e komitetit.
“Këto janë kohët më të këqija për gazetarët që nga themelimi i CPJ,” tha në një deklaratë drejtoresha e komitetit Jodie Ginsberg.
“Lufta në Gaza tregon rënien e normave globale për mbrojtjen e gazetarëve në zonat e konfliktit, por është larg nga i vetmi vend ku ata janë në rrezik”, shtoi ajo.
