Konfindustria i ka kërkuar qeverisë shqiptare të nisë menjëherë përshtatjen e legjislacionit tregtar me politikat ekonomike të SHBA-së, të nisura nga administrata Trump, si dhe me direktivat e reja të Bashkimit Europian, të miratuara në mesin e vitit 2024.
Sipas Konfindustrisë, këto ndryshime kanë ndikim të drejtpërdrejtë në tregjet botërore, përfshirë edhe Shqipërinë, dhe neglizhimi i tyre do të ketë pasoja shkatërruese për industritë dhe prodhimin vendor. Organizata paralajmëron se, pa masa të shpejta, jo vetëm që do të bjerë interesi për investime të reja industriale, por ekziston rreziku i falimentimit masiv të bizneseve prodhuese dhe zhdukjes së markave “Made in Albania”.
Gjendja e prodhimit industrial tashmë është shqetësuese, pasi në tremujorin e tretë të vitit 2024 ka shënuar një rënie prej 5.4% në krahasim me një vit më parë. Po ashtu, deficiti tregtar ka arritur në një rekord historik prej 5.4 miliardë eurosh, duke vënë në pikëpyetje stabilitetin e monedhës kombëtare, lekut.
Të ardhurat valutore nga sektorë si turizmi, ndërtimi dhe burimet informale konsiderohen të paqëndrueshme, çka rrezikon ta zhysë lekun në një cikël të zhvlerësimit të shpejtë. Ky skenar mund të ketë pasoja të rënda për qytetarët, bizneset dhe ekonominë shqiptare, deri në cenimin e qëndrueshmërisë shoqërore dhe rendit kushtetues në vend.
Për këtë arsye, Konfindustria apelon për masa urgjente nga qeveria për të mbrojtur prodhimin vendas dhe stabilitetin ekonomik të Shqipërisë. /Kosovatimes/
