Për 17 vjet, ‘NEWBORN’ ka ndërruar pamje për të reflektuar sfidat dhe arritjet e Kosovës. Në këtë përvjetor, monumenti përcjell mesazhin e inteligjencës artificiale, një temë që po prek botën mbarë. U punua pa u ndalur në të për 10 ditë e 10 net.
Para 17 vjetësh, u zbulua para mijëra qytetarëve monumenti i skalitur me ngjyrë të verdhë e që shënoi lindjen e një shteti të ri, ‘NEWBORN’.
Këtë pamje, me nënshkrimet e qytetarëve që lanë gjurmë në shkronjat gjigante, e mbajti për pesë vjet. Pas kësaj kohe, ideatori Fisnik Ismaili bëri thirrje te qytetarët që të ndihmojnë në ndërrimin e pamjes së monumentit.
Kjo traditë nuk kishte si të mos vazhdonte as në 17-vjetorin e pavarësisë. Ideatori i obeliskut, Fisnik Ismaili, tregoi idenë për dizajnin e këtij viti.
“NEWBORN gjithmonë e tregon një aktualitet ku Kosova përfshihet në botë, qoftë ajo një mesazh politik, ose qoftë mesazh vetëdijësues, si p.sh. NEWBORN ka pas temë fjalën e lirë, ka pas temë ruajtjen e ambientit, ka pas temë të drejtat e grave, dhunën ndaj grave, d.m.th. krejt gjërat të cilat e ndërlidhin Kosovën me botën, e këtë herë që është edhe si tema aktuale shumë është inteligjenca artificiale, është një gjë që o na pëlqen ose jo, ose duam ose e urrejmë është krijuar është bërë pjesë e jetës integrale”, tha Ismaili
E tradita për ndërrimin e pamjes vazhdon çdo vit. Në 10-vjetorin e pavarësisë, dy nga shkronjat e fjalës u zëvendësuan me numrin 10 për të shënuar këtë përvjetor.
NEWBORN u ngjyros me flamujt e shteteve njohëse të pavarësisë së Kosovës, ngjyrat e uniformave të ushtarëve të vendeve që e kishin ndihmuar Kosovën në luftën për çlirimin nga pushtuesit serbë.
Në vitin 2016 ‘NEWBORN’ u emërtua me emrin ‘Izolim’, që kishte për qëllim të përçonte mesazhin e izolimit. Shkronjat kishin marrë ngjyrë të kaltër si qielli dhe ishte mbuluar me gjemba.
Telat me gjemba kishin thirrjen për botën për të gjetur zgjidhjen dhe për integrimin e Kosovës në Bashkimi Evropian.
Në përvjetorin e 14-të, ‘NEWBORN’ u kushtohej grave dhe moton kishte ‘Gratë për Gratë’.
E, një ditë para shënimit të kësaj feste, tanimë kryeqyteti ka marrë pamjen festive. Rrugët e Prishtinës janë mbushur me flamuj të Kosovës dhe ata të Shqipërisë, sikurse ndodh çdo vit. Për nesër, në Ditën e Pavarësisë, në Prishtinë janë planifikuar një sërë aktivitetesh të cilat do të transmetohen drejtpërdrejt nga Radiotelevizioni i Kosovës.
