Manchester United vazhdon të zhgënjejë në këtë sezon. Të dielën është mposhtur nga Tottenham Hotspur në ndeshjen e Javës së njëzet e pestë në Premier League.
Ndeshja në Londër është mbyllur me rezultat 1-0.
Ndeshja ka nisur me ritëm të lartë, me United që ka pasur dy mundësi të mira për të kaluar në epërsi, por Guglielmo Vicario ka ndalur fillimisht Rasmus Hojlund dhe Alejandro Garnacho, ndërsa Diogo Dalot është bllokuar në vijën fatale nga Ben Davies.
Tottenham nuk ka vonuar për t’i ndëshkuar këto shpërdorime të United, duke kaluar në avantazh kur Andre Onana ka grushtuar një gjuajtje të Lucas Bergvall, por që topi ka përfunduar te James Maddison, i cili e ka shtyrë në rrjetë.
United është përpjekur të kundërpërgjigjet me Joshua Zirkzee, i cili ka gjuajtur jashtë, ndërsa Garnacho e ka humbur një mundësi të artë brenda zonës duke e dërguar topin mbi traversë.
Në anën tjetër, “Spurs” ka qenë afër ta dyfishonte epërsinë, por Mathys Tel ia ka arritur ta mposhtë portierin Onana pas një asisti të Son Heung-min.
Pjesa e dytë ka vazhduar me të njëjtin intensitet, me Tel që ka dështuar ta shfrytëzojë një aksion të mirë të Djed Spence. United e ka pasur periudhën më të mirë në lojë me Garnacho që ka sfiduar Vicario me dy gjuajtje të forta, por pa sukses.
Rasti më i mirë për barazim ka ardhur në minutat e fundit, kur Zirkzee e ka provuar me një goditje me kokë, por topi ka kaluar jashtë.
Në anën tjetër, është dashur që Onana të ndërhyjë për ta ndalur një gjuajtje të rrezikshme të Dejan Kulusevski.
Me këtë fitore, Tottenham gjendet në vendin e dymbëdhjetë në renditje, ndërsa Manchester United në vendin e pesëmbëdhjetë. Në anën tjetër, Liverpooli vazhdon të kryesojë tabelën.
