Kryetari i LDK-së, Lumir Abdixhiku, ka thënë se shtetësia e Kosovës është shpagimi i përpjekjes së gjeneratave të tëra, teksa ka bërë thirrje për unifikim për atdheun.
“Kosova shtet, Republikë, është arritja më e madhe e jona. Është shpagim i përpjekjes së gjeneratave të tëra për çlirim e pavarësim; është mburojë e garantuar për të gjithë ata që vijnë. Në këtë ditë nderojmë Atin Themeltar të kësaj Republike, Presidentitn Dr. Ibrahim Rugova prirja e së cilit – në orët tona më të rënda – dha dritë. Sot nderojmë gjithë luftëtarët, martirët e dëshmorët e luftës sonë çlirimtare, të Ushtrisë sonë Çlirimtare, nderojmë Familjen Jashari, sakrifica e të cilëve na qëndron si gurëthemel i vet lirisë. Nderojmë aleatët tanë, ata që bënë luftën me ne, bënë paqen me ne”, ka shkruar ai në facebook.
Abdixhiku ka thënë se përplasjet e brendshme s’mund ta zhbëjnë dashurinë për shtet.
“Në këtë përvjetor të 17-të, le të kujtojmë se dashurinë për pavarësi e shtet s’mund ta zhbëjë përplasja jonë e brendshme. Përplasja është e përkohshme, atdheu ynë është i përhershëm. Ky atdhe na thërret të vazhdojmë rrugëtimin secilën ditë”, vazhdoi ai.
Po ashtu kryetari i Lidhjes Demokratike të Kosovës, Lumir Abdixhiku me bashkëpunëtorë, kanë bërë homazhe tek varri i Presidentit Historik, dr. Ibrahim Rugova në 17 vjetorin e pavarësisë së Kosovës.
Kryetari Abdixhiku në ditën më të rëndësishme historike për vendin tonë, nderoi prijësin, Atin themeltar, Presidentin Rugova, i cili themeloi dhe udhëhoqi lëvizjen më të madhe shqiptare për liri dhe pavarësi, intelektualët e viteve ‘90, familjen komandantit Legjendar Adem Jashari, të gjithë luftëtarët e Ushtrisë Çlirimtare të Kosovës si dhe të gjithë burrat e gratë që dhanë gjithçka për vendin tonë e na mësuan se sa e shtrenjtë është liria e shtetësia.
Po ashtu ai shprehu mirënjohje dhe nderim, për të gjithë miqtë dhe aleatët e Kosovës që në orët më të rënda qëndruan me ne dhe e mbështetën vendin tonë, që ta gëzojmë ditën e sotme.
Kryetari Abdixhiku ua uroi të gjithë qytetarëve të Kosovës, festën e Pavarësisë.
