Zëvendëskryeministri i parë për Integrim Evropian, Zhvillim dhe Dialog i Republikës së Kosovës, në detyrë, Besnik Bislimi, u takua në Varshavë edhe me sekretaren e Shtetit për Çështjet Evropiane të Kroacisë, Andreja Metelko-Zgombiq.
Përmes një njoftimi për medie bëhet e ditur se në këtë takim, u diskutua mes tjerash mbi mbarëvajtjen e zgjedhjeve të fundit të 9 shkurtit, mbi rrugëtimin e Kosovës drejt integrimit evropian dhe situatës në rajon.
“Duke shprehur mirënjohjen për mbështetjen e vazhdueshme e të palëkundur të Kroacisë ndaj Kosovës, zëvendëskryeministri Bislimi vlerësoi lartë marrëdhëniet e shkëlqyeshme të dyanshme dhe partneritetin mes dy vendeve tona”, thuhet në njoftim.
Tutje, zëvendëskryeministri Bislimi theksoi hapat e rëndësishme përpara që ka bërë vendi ynë në këto katër vitet e fundit bashkë me rëndësinë e avancimit në proceset e integrimit evropian.