Administrata e presidentit amerikan Donald Trump po përpiqet të arrijë një marrëveshje armëpushimi në Ukrainë deri në Pashkë, e cila bie më 20 prill të këtij viti, ka mësuar Bloomberg , duke cituar burime të njohura me situatën. “Administrata Trump u ka thënë zyrtarëve evropianë se dëshiron të sigurojë një armëpushim në Ukrainë deri në Pashkë”, raportoi Bloomberg, duke cituar zyrtarë.
Megjithatë, disa zyrtarë kanë shprehur dyshime për realizueshmërinë e këtij qëllimi, duke vënë në dukje se ritmi i negociatave – të cilat janë vendosur të fillojnë këtë javë në Arabinë Saudite me pjesëmarrjen e përfaqësuesve të lartë amerikanë dhe rusë – është ambicioz dhe potencialisht jorealist.
“Ka shumë më shumë gjasa që një zgjidhje të mund të arrihet deri në fund të këtij viti,” tha raporti, duke cituar një burim shtesë. Ndërkohë, Shtëpia e Bardhë nuk ka komentuar për këtë çështje.
Trump nisi përpjekjet e tij për paqe javën e kaluar me një telefonatë me Vladimir Putin. Më pas, zyrtarët evropianë u befasuan kur Sekretari i ri i Mbrojtjes i SHBA-së deklaroi se vendet evropiane do të ishin përgjegjëse për sigurimin e garancive të sigurisë dhe forcave paqeruajtëse në Ukrainë pas arritjes së një marrëveshjeje.
“Strategjia favorizon Putinin”
Bloomberg citon gjithashtu zyrtarë evropianë të thonë se strategjia e SHBA mund të funksionojë në favor të Putinit, pasi Trump ka rënë dakord për lëshime të rëndësishme edhe para fillimit të bisedimeve.
Ndërkohë, presidenti francez Emmanuel Macron do të presë sot një samit me liderët e Gjermanisë, Mbretërisë së Bashkuar, Italisë, Polonisë, Spanjës, Holandës dhe Danimarkës. Së bashku me Sekretarin e Përgjithshëm të NATO-s Mark Rutte, ata planifikojnë të diskutojnë reagimin e tyre dhe hapat e ardhshëm.
