Policia e Kosovës ka ndaluar 12 persona, 10 prej tyre të mitur, në dyshimin se kanë hyrë me flamuj shqiptarë në Mitrovicën e Veriut.
Zëvëndësdrejtori i Policisë së Kosovës, në Mitrovicë të Veriut, Veton Elshani, ka bërë të ditur se 12 personat e ndaluar, 10 prej tyre të mitur, dyshohet se kanë hyrë në veri të Mitrovicës me flamuj shqiptarë, derisa dyshohet gjithashtu se janë sulmuar me gurë nga disa serbë.
“Janë ndaluar 12 persona, 10 të mitur, dyshohet se me flamuj shqiptarë kanë hyrë në Mitrovicë të Veriut. Dyshohet se disa serbë më pas i kanë sulmuar me gurë. I kemi ndalu dy vetura, në njërën veturë kanë qenë pesë të mitur. Në veturën tjetër kanë qenë shtatë persona. Ende nuk ka ndonjë vepër, përveç për patentë shofer e kundërvajtje në trafik, për ketë punë jemi duke u marrë me ta”, ka theksuar Elshani.
Tutje, ai sqaroi se nuk ka vepër për përdorimin e flamujve, teksa shtoi se policia është duke e trajtuar ketë rast, pasi që personat janë të mitur dhe se ky rast është hapur si ‘dëmtim kriminal’.
Elshani ka bërë të ditur se të gjithë të ndaluarit janë liruar. Ai ka thënë se Policia e Kosovës ka shqiptuar katër tiketa, përfshirë tri për mungesë të patentë shoferit, dy nga të cilat ishin të mitur, dhe një tjetër për më shumë persona në automjet se sa që është e lejuar, ku në një pikap ishin transportuar shtatë persona.
Ndërkohë, politikani serb Aleksandar Arsenijeviq ka publikuar në “Facebook” video ku shihen duke festuar me vetura me flamuj shqiptarë.
