Me rastin e 17-vjetorit të Pavarësisë së Kosovës, Presidentja Vjosa Osmani ka pranuar një mesazh urimi nga presidenti i Estonisë, Alar Karis, i cili ka shprehur angazhimin për të forcuar bashkëpunimin në fusha të ndryshme.
Në mesazhin e tij, Presidenti Karis ka theksuar marrëdhëniet e shkëlqyera midis dy shteteve dhe ka shprehur dëshirën për të forcuar më tej miqësinë, sidomos në fushat e digjitalizimit dhe qeverisjes elektronike.
Ai ka ripërsëritur mbështetjen e Estonisë për zgjerimin e Bashkimit Evropian dhe integrimin e Kosovës në organizatat ndërkombëtare, duke theksuar gatishmërinë për të ndarë përvojën e Estonisë në procesin e integrimit në BE dhe reformat përkatëse.
“Duke iu referuar takimit të fundit me Presidenten Osmani në Konferencën e Sigurisë në Mynih, Presidenti Karis ka shprehur shpresën se diskutimi ka dhënë një shtysë të re për bashkëpunimin e ardhshëm dhe se iniciativat e diskutuara do të hapin rrugën për një bashkëpunim domethënës në fusha kyçe me interes të përbashkët”, thuhet në njoftimin e Presidencës.
