Pas rinovimeve me Manuel Neuer, Alphonso Davies dhe Jamal Musiala, Bayern Munich është shumë pranë finalizimit të një tjetër marrëveshjeje.
Sipas “Sport Bild’, ‘bavarezët’ janë në fazën përfundimtare të negociatave me Dayot Upamecano.
Lajmin e ka konfirmuar edhe drejtori sportiv i klubit, Christoph Freund.
“Upa e di që duam të rinovojmë kontratën e tij. Kemi zhvilluar një sërë bisedash shumë të mira me të. Ne duam ta mbajmë atë në ekip edhe në të ardhmen”, tha ai.
Upamecano, shtylla e mbrojtjes ‘bavareze’
Edhe pse sezonet e fundit nuk kanë qenë të përsosura për qendërmbrojtësin francez, ai ka bërë një hap përpara këtë edicion, duke siguruar një vend kyç në mbrojtjen e Bayern Munich.
“Jemi shumë të lumtur me rritjen e tij. Ai është gjithashtu shumë i kënaqur te Bayerni”, shtoi Freund.
Aktualisht, kontrata e 26-vjeçarit skadon në vitin 2026, dhe klubi po punon për të shmangur një largim të tij me parametra zero në të ardhmen.
E ardhmja e Kimmich dhe Sane mbetet e paqartë
Ndërkohë, dilemat vazhdojnë për Joshua Kimmich (30) dhe Leroy Sane (29), të cilëve u skadon kontrata në verën e vitit 2025. Kimmich duket më afër rinovimit, ndërsa Sane dëshiron të qëndrojë, por ende nuk ka marrë një ofertë konkrete nga klubi.
Sa i përket lojtarëve me përvojë si Sven Ulreich (36), Eric Dier (31) dhe Thomas Müller (35), vendimi për rinovimin e tyre do të merret pas përfundimit të sezonit.
Bayern Munich vazhdon strategjinë e tij për të siguruar të ardhmen e ekipit, me synimin për të ruajtur stabilitetin dhe konkurrencën në nivelet më të larta.
