Edhe Shoqata e Prokurorëve të Kosovës, e ka dënuar sulmin e sotëm ndaj prokurorit të Departamentit të Përgjithshëm në Prokurorinë Themelore në Pejë, Ramiz Buzhala, në ambientet e tij zyrtare.
“Ky akt i papranueshëm dhe i rëndë përbën një sulm jo vetëm ndaj një prokurori në kryerje të detyrës, por edhe ndaj të gjithë sistemit të drejtësisë dhe përpjekjeve të tij për të mbrojtur rendin dhe ligjin”, thotë Shoqata e Prokurorëve.
Kanë shprehur mbështetjen e plotë për prokurorin Buzhala dhe të gjithë prokurorët, të cilët, sipas tyre, pavarësisht sfidave dhe rreziqeve, vazhdojnë me profesionalizëm punën e tyre për të siguruar sundimin e ligjit dhe mbrojtjen e interesit publik.
“Ftojmë organet kompetente të trajtojnë me prioritet këtë rast dhe të ndërmarrin të gjitha veprimet e nevojshme për të vënë para drejtësisë autorët e këtij sulmi, si dhe të ndërmarrin masa për të parandaluar raste të tilla në të ardhmen. Çdo përpjekje për të frikësuar apo penguar punën e prokurorëve është e papranueshme dhe cenon rëndë pavarësinë e sistemit të drejtësisë”, thuhet në reagimin e shoqatës.
Shoqata e Prokurorëve të Kosovës thotë se do të vazhdojë të mbështesë dhe të mbrojë të drejtat e prokurorëve dhe siguron se asnjë akt i tillë nuk do të ndikojë në përmbushjen e detyrës së tyre kushtetuese dhe ligjore. /Kosovatimes/
