Komisioni Evropian ka paralajmëruar Malin e Zi se rrezikon të marrë fonde nga Plani i Rritjes nëse nuk tërheq vendimet për ndryshimet në regjimin e vizave për vendet e treta deri në fund të këtij muaji. Duke pasur parasysh numrin në rritje të vendeve që nuk janë në përputhje me regjimin e vizave të BE-së, dhe për të përmbushur hapat e Agjendës së Reformës, Mali i Zi duhet të heqë dy vende nga regjimi i tij pa viza deri në fund të shkurtit 2025.
Ky reagim vjen pasi Mali i Zi shtoi një vend të ri, Bahrejnin, në regjimin e tij pa viza dhe ndryshoi regjimin pa viza të Arabisë Saudite nga sezonal në të përhershëm.
Lidhur me këtë reagim të Komisionit Evropian Qeveria e Malit të Zi tha se “në rrethanat aktuale globale, qasja në tregje të reja dhe ardhja e lehtësuar e turistëve dhe investitorëve janë çelësi për qëndrueshmërinë e turizmit malazez. Janë pikërisht interesat e qarta ekonomike ato që janë arsyeja kryesore pse Mali i Zi vendosi një regjim pa viza me një numër të caktuar vendesh”.
“Në bashkëpunim me BE-në do të vazhdojmë të kërkojmë zgjidhjet më të mira, të cilat do të kënaqin njëkohësisht interesat tona kombëtare ekonomike dhe detyrimet që kemi në procesin e anëtarësimit në BE”, theksohet në reagimin e qeverisë malazeze.
Këto veprime opozita malazeze i sheh si kërcënim për të ardhmen evropiane të Malit të zi dhe akuzoi partitë në pushtet për shkatërrimin e institucioneve shtetërore të Malit të Zi.
“Prej vitit 2020 partitë në pushtetin e Malit të Zi po bëjnë garë se kush më shumë po i shkatërrojë institucionet dhe sistemin e sigurisë për të parandaluar integrimin evropian të vendit”, tha kryetari i Partisë Demokratike Socialiste në opozitë, Danijel Zhivkoviç.
Në anën tjetër grupi joformal i studentëve “Kamo Sjutra” (“Kah nesër”) njoftoi të mërkuren se ka ngritur padi për shpifje kundër Partisë Demokratike të Malit të Zi dhe zyrtarëve të saj në qeveri.
Sipas këtij grupi, zyrtarët qeveritarë nga kjo parti kanë bërë “akuza të pavërteta për lidhje të organizatorëve të protestës studentore me klane kriminale dhe për korrupsion”, duke rrezikuar, sipas tyre drejtpërdrejt këtë grup.
Ata akuzuan Ministrin e Brendshëm, Danilo Sharanoviç për komentet e bëra në shtyp kur u shpreh se “ka të dhëna operacionale për një vlerësim të tillë”, ndonëse sipas studentëve, ai nuk ka dhënë asnjë provë për to.
Sipas grupit studentor, akuzat nga zyrtarët politikë ndaj organizatorëve kanë nxitur gjuhën e urrejtjes, kërcënimet dhe fyerjet në rrjetet sociale ndaj tyre.
Protestat e përditshme kanë vazhduar me bllokimin e rrugëve në Podgoricë dhe qytete tjera që nga fillimi i vitit. Studentët po kërkojnë dorëheqjen e drejtuesve të sektorit të sigurisë për masakrën në Cetinë, në të cilën u vranë 13 persona dhe u plagosën tre të tjerë.
Protestat e studentëve po gjejnë mbështetje edhe tek publiku në Mali të Zi, ku shumë banorë shprehen të zemëruar me ato që i konsiderojnë reforma të ngadalshme të policisë, e cila ka mungesë punonjësish dhe fondesh dhe grindjeve burokratike dhe politike brenda qeverisë.
