Ministri në detyrë i Mbrojtjes, Ejup Maqedonci, në trevjetorin e agresionit rus në Ukrainë, ka kujtuar kontributin që Kosova ka dhënë dhe po jep për të mbështetur luftën e popullit ukrainas përballë Ushtrisë ruse.
Në një postim në Facebook, Maqedonci ka thënë se sot 3 vite më parë, Rusia nisi agresionin e saj me qëllim të pushtimit të Ukrainës, duke risjellur luftën e këtyre përmasave në kontinent e ndryshuar pozicionet e shteteve mbi paqen dhe nevojën për rritje kapacitetesh ushtarake.
Në këto tri vite, Maqedonci tha se populli trim ukrainas ka luftuar kundër një agresori të pabarabartë por me motiv dhe atdhe dashuri ia ka arritur të thyej parashikimet e agresorëve për këtë invazion.
“Në këto tri vite, ata janë mbështetur nga bota perëndimore me ndihma dhe armatim. Në kapacitetet tona, Kosova ka ndërmarr gjithçka për të mbështetur këtë luftë të drejtë të popullit ukrainas.
Mes tjerash, në aspektin ushtarak, ne kemi trajnuar për EOD 5 grupe në Kosovë, që nga viti 2023 jemi pjesë e operacionit Interflex ku jemi duke trajnuar në Mbretërinë e Bashkuar rekrutët ukrainas ndërsa vitin e kaluar kemi dërguar dy pako mbështetëse ushtarake”, ka thënë Maqedonci.
Ai ka theksuar se Kosova është ndër vendet e para që ka strehuar disa gazetar ukrainas të cilët vazhdojnë të ushtrojnë profesionin nga këtu.
“Populli ukrainas na ka rikonfirmuar edhe njëherë që atdhedashuria dhe sakrifica janë elemente më të rëndësishme sesa fuqia ushtarake e armikut përballë”, ka thënë ai.
