Nesër është paraparë të nisë numërimi i votave të qytetarëve që kanë votuar në përfaqësitë diplomatike të Kosovës. Bëhet fjalë për 15.552 vota të bashkatdhetarëve që e kanë shfrytëzuar të drejtën për të votuar në konsullata. Gjithashtu janë edhe 62.990 zarfe me vota të diasporës, të cilat kanë ardhur përmes postës. Këto vota dhe votat me kusht dhe të personave me aftësi të kufizuara pritet të nisin të numërohen gjatë javës.
KQZ-ja ka paraparë që deri më 5 mars t’i shpallë rezultatet përfundimtare të këtyre zgjedhjeve.
Përndryshe as mbledhja e sotme e KQZ-së nuk ka kaluar pa tension. PDK kërkoi hetime për, siç tha, disa kuti votash të dyshimta, ndërsa VV e kundërshtoi këtë.
Krijimin e një komisioni për t`i hetuar disa raste të kutive të dyshimta e kërkoi anëtari i PDK-së në KQZ, Ilir Gashi. Ai kërkoi që të sqarohet edhe votimi deri në mesnatë në QKUK.
“Unë kërkoj nga ju që ta bëni një komision për të hetuar, faktikisht edhe kutinë në Gjakovë, mbi të cilën është thënë se ka qarkullu ‘treni bullgar’, kutia 020706, e cila është objekt hetimi”, tha Gashi.
Por, kështu nuk mendoi anëtari i VV në këtë institucion, Alban Krasniqi.
“Këndvështrim ky komplet i njëanshëm, politik dhe jo profesional i kolegut, sepse për kutinë në Gjakovë organet janë duke u marrë dhe ne nuk kemi nevojë të ndërrmarim një veprim tjetër, përvecc asaj që organet e hetuesisë kanë bërë, pra i kanë marrë materialet i shikojnë dhe në bazë të kësaj ato vijnë me një raport dhe në bazë të cilit edhe ne veprojmë” deklaroi Alban Krasniqi.
Në mbledhje u bënë të ditura arsyet e refuzimit të 4.865 pakove me fletëvotime të dërguara në kutitë postare të KQZ-së. Numri më i madh i votave janë refuzuar gjatë fazës së aplikimit për regjistrim si votues jashtë Kosovës.