Peizazhi gjeopolitik i sigurisë evropiane po kalon një transformim të thellë, i nxitur nga ndryshimi i prioriteteve strategjike të SHBA-së dhe rritja e thirrjeve për vetë-mjaftueshmërinë e kontinentit.
Ministri francez i financave Eric Lombard tha se ai pret që SHBA të sigurojë mbështetje për forcat paqeruajtëse evropiane pas arritjes së një armëpushimi midis Ukrainës dhe Rusisë.
Lombard i tha Televizionit Bloomberg në Cape Town, ku po merr pjesë në një takim të ministrave të financave të G20, se Britania, Gjermania, Franca dhe vende të tjera evropiane janë të gatshme të dërgojnë forca për të garantuar zbatimin e armëpushimit.
Ish-kryeministri suedez dhe bashkëkryetari i Këshillit Evropian për Marrëdhëniet me Jashtë Carl Bildt tha se marrëveshja për mineralet midis Ukrainës dhe SHBA-së duket si një “histori anësore me rëndësi të kufizuar”.
Bildt i tha BBC-së se marrëveshja “duket si diçka që synon ta bëjë Trump të lumtur”, por se “nuk do të sjellë burime të rëndësishme financiare në SHBA ose të ketë një ndikim ekonomik material për vite me radhë”.
Si shembull, ai përmendi hapjen e minierave të reja, e cila kërkon investime të mëdha dhe sjell të ardhura vetëm pas disa vitesh. “Kjo marrëveshje është më shumë e përshtatur për psikologjinë e presidentit amerikan sesa për rrethanat reale në Ukrainë”, përfundoi Bildt.
Presidenti i SHBA Donald Trump pretendon se marrëveshja do t’i lejonte SHBA-së të gjeneronte më shumë të ardhura sesa ka shpenzuar deri më tani për ndihmën për Ukrainën. Megjithatë, detajet e marrëveshjes nuk dihen ende 100%.
Një burim nga Zyra e Presidentit të Ukrainës deklaroi se në këtë fazë janë rënë dakord për kushtet fillestare të marrëveshjes me SHBA-në, e cila përfshin burimet kryesore minerale dhe burime të tjera natyrore të Ukrainës. “Kushtet e marrëveshjes tani janë shumë më të favorshme për Ukrainën”, shtoi burimi.
Sipas raportimeve, krijimi i një fondi të përbashkët është planifikuar të përdoret për të rindërtuar infrastrukturën dhe ekonominë e Ukrainës. Ky fond do të merrte një pjesë të konsiderueshme të të ardhurave të Ukrainës nga burimet e saj natyrore.
Në pamje të parë, duket se Trump është tërhequr nga çmimi i përmendur më parë prej 500 miliardë dollarësh, por marrëveshjes thuhet se i mungon ende ajo që Presidenti Volodymyr Zelensky ka kërkuar prej kohësh – garancitë e sigurisë që do të parandalonin një tjetër sulm rus.
Megjithatë, duket se një vizitë në Uashington po përgatitet për më vonë këtë javë. Në një mjedis politikisht të tensionuar, ndërsa Uashingtoni po afrohet gjithnjë e më shumë me Moskën, shpresohet se kjo marrëveshje mund të rigjallërojë bashkëpunimin midis Kievit dhe aleatit të tij dikur më të madh, thekson BBC në një analizë.
Aksionet financiare të SHBA-së në burimet e Ukrainës mund t’i japin Shtëpisë së Bardhë një arsye për të mbrojtur Ukrainën nëse lufta ndizet përsëri pas nënshkrimit të armëpushimit, sipas BBC.
KIEV ka rënë dakord me kushtet e një marrëveshjeje për mineralet e rralla me Shtetet e Bashkuara dhe presidenti ukrainas Volodymyr Zelensky mund ta nënshkruajë atë pasnesër në Uashington, ndërsa evropianët takohen sot në Bruksel për të provuar të ndikojnë në një zgjidhje të konfliktit në Ukrainë. Detaje të reja të marrëveshjes dolën brenda natës.
