Situata e krijuar tash e shtatë muaj me mos miratimin e buxhetit për këtë vit, pritet të marrë epilogun e duhur të enjten e 27 shkurtit.
Kryetari i Komunës së Gjilanit Alban Hyseni, tha se pas takimit të fundit të Komitetit për Politikë dhe Financa, i është kërkuar të anuloj thirrjen për seancën urgjente të orës 16:00, e cila tashmë është anuluar, njofton Komuna e Gjilanit.
“Gjithashtu, në KPF u pajtuam që nesër, më 27.02.2025, si kryetar i komunës të thërras seancën e radhës urgjente, me fillim nga ora 10:00. Pika e vetme e rendit të ditës do të jetë shqyrtimi dhe aprovimi i projektbuxhetit për vitin 2025, të propozuar nga unë si kryetar i komunës”, tha Alban Hyseni.
Në njoftimin e komunës, thuhet se i pari i Gjilanit përshëndeti reflektimin e opozitës (LDK dhe PDK) si dhe arritjen e mirëkuptimit për të zgjidhur situatën e krijuar me buxhetin prej tashmë 7 muajsh.
