Ministri i Mbrojtjes, Ejup Maqedonci, ka njoftuar për takimin e Këshillit Shtetëror për manifestimin gjithëpopullor për shënimin e Epopesë së Ushtrisë Çlirimtare të Kosovës.
“Në cilësinë e Kryesuesit të Këshillit Shtetëror për manifestimin gjithëpopullor për shënimin e Epopesë së Ushtrisë Çlirimtare të Kosovës, më 5, 6 dhe 7 mars, së bashku me bashkëkryesuesin e këshillit, kryetarin e Komunës së Skenderajt, Fadil Nura, si dhe me anëtarët e tjerë të këtij këshilli, në një takim të përbashkët vendosëm dhe harmonizuam aktivitetet që do të zhvillohen për nder të 5, 6 dhe 7 marsit 1998, ditëve të Epopesë së UÇK-së”, ka shkruar ai në Facebook.
Maqedonci më tej ka thënë se Epopeja e UÇK-së nënkupton përkujtim të zhvillimit të vendit.
“Sivjet bëhen 27 vite nga rënia heroike e kryekomandantit Adem Jashari dhe gjithsej 59 të rënëve të tjerë në Prekaz, në mars të vitit 1998. Duke e përkujtuar Epopenë e UÇK-së si cila ishte vendimtare në zhvillimet e mëtejme të luftës tonë çlirimtare duke kulmuar me çlirimin dhe lirinë e vendit tonë, ne i kujtojmë detyrimet tona në shërbim të zhvillimit të vendit me theks të veçantë forcimin e ushtrisë së Republikës së Kosovës”, ka thënë Maqedonci.
