Ministrja e Drejtësisë, Albulena Haxhiu, ka thënë se kanë adresuar në polici e prokurori, atë që ajo e ka quajtur skemë të organizuar kriminale, rreth votave të ardhura nga mërgata përmes postës.
Sipas saj, hetimet e shpejta do të mund të shpëtonin integritetin e zgjedhjeve.
“Skema e organizuar kriminale tashmë është raportuar në polici dhe prokurori. Hetimet serioze dhe të shpejta mund të shpëtojnë integritetin e zgjedhjeve dhe t’i vendosin para drejtësisë keqbërësit”, ka shkruar Haxhiu, derisa ka shpërndarë një status të kolegut të saj ministër, atij të Financave, Hekuran Murati i cili ka shkruar gjatë ditës së “anomalia e votave me postë për LDK-në vërehet edhe me sy të lirë”.
Për këtë ai ka paraqitur një tabelë me votat e partive politike të ardhura me postë duke bërë edhe krahasimin e zgjedhjet e kaluara.
“Këtë më së miri e shpërfaqë krahasimi i votave me postë sivjet, me votat me postë nga zgjedhjet nacionale të vitit 2021. Përderisa LV qëndron pothuajse pandryshuar, kurse PDK e AAK kanë një rritje prej 32%-48%, tek LDK rritja është abnormale me mbi 367%”, ka shkruar Murati, derisa thotë se kjo do të duhej të ishte e mjaftueshme për të alarmuar prokurorinë të fillojë hetimin për të zbuluar skemën dhe identifikuar keqbërësit.
