Administrata e presidentit amerikan Donald Trump, e cila ka shtrënguar politikat e saj për migracionin, po përgatit plane për të rishikuar statusin e qytetarëve ukrainas që mbërritën në vend pasi Rusia filloi pushtimin e saj në shkallë të gjerë të Ukrainës. Këtë e raporton Reuters , duke cituar burime.
Rreth 240 mijë refugjatë nga Ukraina morën të drejtën e qëndrimit të përkohshëm në Shtetet e Bashkuara për arsye humanitare. Megjithatë, atyre mund t’u hiqet statusi që në prill, raportoi Reuters, duke cituar një zyrtar të administratës dhe burime të tjera. Si rezultat, shumica e tyre do të duhet të largohen nga vendi për të shmangur dëbimin.
Nuk kishte asnjë njoftim zyrtar të këtij vendimi apo përgatitjes së tij.
Tashmë më 20 janar, ditën kur Trump mori detyrën, presidenti urdhëroi anulimin e Programit të Përkohshëm të Mbrojtjes Humanitare për qytetarët e Kubës, Haitit, Nikaraguas dhe Venezuelës. Vendimi nuk zbatohej për shtetasit ukrainas, si dhe për rreth 70 mijë afganë që u larguan nga Afganistani pas ardhjes në pushtet të talebanëve.
