Në kuadër të festave të 7 dhe 8 marsit, në Tuz të Malit të Zi, do të mbahet manifestimi “Forcimi i Bashkëpunimit Ndërmjet Grave Shqipfolëse të Rajonit”. Ky aktivitet dyditor nis sonte me një mbrëmje gala.
Marina Camaj Ujkaj, sekretare e Sekretariatit për Vetëqeverisje Lokale në Komunën e Tuzit, foli për rëndësinë e këtij aktiviteti në një lidhje të drejtpërdrejtë në RTK:
“Ky aktivitet është shumë i rëndësishëm për komunën tonë, pasi është edicioni i tretë. Me kënaqësi të madhe e kemi pranuar ftesën e Unionit që ta organizojmë edhe këtë vit në komunën tonë. Është kënaqësi dhe nderë që në komunën tonë do të kemi të pranishëm personalitete nga fushat e ndryshme, që do të kontribuojnë për këtë aktivitet”, tha ajo.
Sipas Camaj Ujkajt programi i manifestimit përfshin tri etapa: Mbrëmja Gala (7 mars, ora 19:00), ku bëhet pritja e personaliteteve në bodrumin “Ship Shanik”, e organizuar nga kryetari i komunës dhe përfaqësues të Kuvendit Qendror Lokal; Konferenca (8 mars, ora 10:00), e cila të zhvillohet në komunën e Tuzit dhe do të përbëhet nga tri panele, ku do të marrin pjesë zonja të dalluara në fushat e tyre, përfshirë Edita Tahirin, Eliza Hoxhën, Genta Popën, Alketa Gashin dhe Marsela Qibukajn; si dhe Kuzhina e Hapur (8 mars), një aktivitet i veçantë që do të zhvillohet në sheshin ‘Skënderbe’, ku do të promovohen ushqimet tradicionale shqiptare.
