Policia e Kosovës ka njoftuar se të hënën në magjistralen Dheu i Bardhë-Gjilan, kanë ndaluar një veturë me targa të Serbisë, të cilën e drejtonte një kosovar, në të cilën kanë gjetur dy pako me barna të ndryshme me banderola të Serbisë.
I dyshuari thuhet se ka pranuar se ka edhe të tjera barna në Prishtinë.
“Lidhur me rastin personi i dyshuar ka pranuar se ka edhe barna tjera në Prishtinë, me ç’rast njësia e TASKFORC-ës së bashku me Doganën e Kosovës dhe Hetimet Rajonale kanë shkuar në vendin e ngjarjes dhe në konsultim me prokurorin e shtetit është kryer kontrolli në garazhin e të dyshuarit ku janë gjetur: 169 artikuj barnash të ndryshme, vlera e tyre llogaritet të jetë rreth tridhjetë mijë euro pa llogaritur shmangiet doganore”, thuhet në njoftim.
Ndërsa në lidhje me rastin është kontaktuar prokurori kompetent, me urdhër të të cilit iniciohet rasti kontrabandë me mallra.
Po ashtu vetura dhe barnat janë konfiskuar nga Dogana e Kosovës ndërsa i dyshuari është liruar në procedurë të rregullt.
