Ministri i Administrimit të Pushtetit Lokal, Elbert Krasniqi, i cili në zgjedhjet e 9 shkurtit ka fituar edhe një ulëse në Kuvendin e Kosovës, në mesin e 10 prej tyre sa i takojnë komunitetit jo serb në Kosovë, tha se ai do të jetë pjesë e një koalicioni, aty ku kryeministër do të jetë Albin Kurti. Kështu ai u përgjigj kur u pyet nga gazetarët, nëse do të jetë i hapur për një bashkëpunim me një qeveri të opozitës. Ai tha se bashkëpunimi me Vetëvendosjen i nisur nga 2019-ta është parimor e i bazuar në mirëbesim, derisa është shfaqur i bindur për një qeveri “Kurti 3”. “Po bashkëpunim me kryeministrin Kurti, do të jem pjesë e koalicionit të ardhshëm qeveritar, dhe tashmë është shumë mirë i definuar ky partneritet i joni që fillon nga viti 2019, kur kam qenë pjesë e GP- LVV, kështu që është gjithçka parimore edhe e bazuar në këtë mirëbesimin e krijuar për këto 4 vite si ministër i qeverisë së udhëhequr nga kryeministri Kurti. Do të jem pjesë e një koalicioni ku kryeministër është, Albin Kurti”, tha ai. Nuk ka dashur të flasë shumë në emër të partive tjera të komuniteteve, që gjithashtu siguruan ulëse në Kuvend, por tha se nga diskutimet që ka pasur nga ata që janë pjesë e koalicionit në qeverinë e tashme, vullneti i tyre, tha ai, është që të jenë pjesë e qeverisë në krye me Kurtin. “Është e padrejtë të flas në emër të atyre. IRDK-ja, ku u në jam kryetar i partisë, ka fituar një ulëse në Kuvend. Vota e qytetarëve ka vendosur që të jem lideri më i votuar i komuniteteve jo serbe. Unë nuk mund të flas, por nga diskutimet që kam edhe me kolegë që janë në qeveri, vullneti i tyre është që të jenë pjesë e qeverisë “Kurti 3”, që do të jetë në ardhje shumë shpejt”, tha ai.

Last updated: 2025/03/12 at 2:37 PM

Kosova Times Published March 12, 2025

Policia e Kosovës ka njoftuar se Drejtoria Rajonale e Policisë në Gjakovë ka realizuar planin 6 ditor “Droni”, gjatë të cilit ka shqiptuar 752 gjoba dhe ka hequr 125 patentë shoferë.

Sipas njoftimit në kuadër të këtij plani gjashtë ditor janë shqiptuar 752 gjoba për kundërvajtje të ndryshme, përfshirë: shpejtësinë mbi normat e lejuara, përdorimin e telefonit gjatë ngasjes, mosvendosjen e rripit të sigurisë gjatë ngasjes etj.

Po ashtu thuhet se 125 shoferëve u janë marrë përkohësisht patentë shoferët dhe u është shqiptuar masa mbrojtëse e ndalimit të drejtimit të mjetit motorik. Kjo masë është marrë ndaj shoferëve që kanë kryer shkelje të rënda të rregullave të komunikacionit, si: tejkalime në zona të ndaluara, tejkalime të kolonës së mjeteve duke rrezikuar sigurinë e pjesëmarrësve në trafik etj.