Në Dukagjin po shtohen rastet e vjedhjeve të bagëtive, duke i lënë fermerët në vështirësi të mëdha. Vetëm në Novosellë, Dobrigjë dhe Baballoq, janë raportuar disa raste të vjedhjeve të bagëtive. Fermerët thonë se po bëjnë roje natën, ndërsa Policia e Kosovës, në bashkëpunim me Prokurorinë, ka nisur hetimet për rastet.
Ahuri i bagëtisë i ka ngelur bosh, pasi që ato dy krerë gjedhe që kishte, që të dyja ia vodhën hajnat në natën mes 10 e 11 marsit. Pren Lekaj nga Novosella e Gjakovës thotë se për këtë mësoi herët në mëngjes kur shkoi për t’i ushqyer.
“Ndoshta ka qenë ora 6 pa dhjetë, kam ardhur këtu edhe e hapa derën me shpin të dorës edhe hyra brenda kur po shoh asnjëra. I shoh zinxhirët e njërës në tokë, ata tjetrin e kishin marrë me zinxhir. E po i lutna atij që i ka marrë, jo që jam duke i frikësuar, por për nder të vet me qenë burrë e bien lopën me mëzat ose e gjen mënyrën qysh me m’u lajmërua. Se unë, qysh ka thanë ai i moçmi s’kam plumb për të. Ai e meriton çdo gjë t’i thuhet po unë s’po mundem”, tha Lekaj.
Për fat të keq kjo dukuri e shëmtuar po bëhet gjithnjë e më e shpeshtë, thonë banorët e kësaj ane të cilët po ashtu kanë pësuar këto ditë. Arif Shabanaj, nga fshati Dobrigje, është njëri prej tyre.
“Këtu e kishin pas hapur këtë derë edhe nuk e gjeta viçin këtu. Viç nja 1500 euro, mështjerrë ka qenë duke thithë qumështin. Kështu, kur u zgjova në mëngjes me ju qit ushqim, nuk e gjeta. Këqyr andej e këtej, kur dola mbas stallës e kishin pas ngre e qit në rrugë edhe deri më tash asgjë nuk di për të. I kam lajmërua policinë. Kanë ardhur i kanë bërë ato punët e veta edhe hala veç nuk ka gjë, një muaj veç u bë. Tash po flitet se janë bërë edhe 7-8 vjedhje tjera”, tha ai.
Edhe familja Mataj, nga Baballoqi i Deçanit, është viktimë e këtij rrjeti keqbërës në Dukagjin.
“Ma kanë marrë një mëzat këtu e kanë thye derën dhe e kanë marrë mëzatin afër 500kg. Janë duke vazhduar duke vjedhur për çdo natë e ne jemi duke bërë roje për natë se mos po takohemi me ta, por tash ishalla nuk takohemi. Urojmë t’i zëjë policia sa më shpejt”, tha Armir Mataj, fermer.
E ndërsa në Policinë e Kosovës thanë se për të gjitha këto raste policia e Kosovës ka angazhuar njësitet policore në vendin e ngjarjes, me ç’rast ka njoftuar edhe Prokurorinë. Kështu që pas konsultimeve të nevojshme rastet janë duke u hetuar si vepra penale ‘vjedhje e rëndë’.
