Ministri Nenad Rashiq priti sot përfaqësuesit e Organizatës Ndërkombëtare për Migracionin në kabinetin e Ministrisë për Komunitete dhe Kthim. Gjatë këtij takimi u diskutua për bashkëpunimin e suksesshëm deri tani ndërmjet Ministrisë dhe IOM-it, si dhe për planet për vazhdimin dhe zgjerimin e projekteve të përbashkëta që kanë si qëllim përmirësimin e kushteve të jetesës për komunitetet pakicë.
Përmes një njoftimi për medie bëhet e ditur se ministri Rashiq theksoi rëndësinë e partneritetit strategjik me IOM-in, duke theksuar se mbështetja e tyre është kyçe për realizimin e shumë iniciativave që lidhen me kthimin, reintegrimin dhe fuqizimin e komuniteteve. Ai gjithashtu e përkujtoi faktin se përmes projekteve të mëparshme janë implementuar me sukses forma të ndryshme të ndihmës, si projekte infrastrukturore dhe ekonomike që ndihmuan në reintegrimin e të kthyerëve dhe rritën mundësitë e tyre për një jetë të qëndrueshme në komunitetet e tyre.
Ndërsa përfaqësuesit e IOM-it lavdëruan punën e deritanishme të Ministrisë, duke theksuar rëndësinë e ruajtjes së komunikimit të vazhdueshëm dhe shkëmbimit të përvojave. Gjatë takimit u diskutua gjithashtu për mundësitë e vazhdimit të iniciativave ekzistuese, si dhe për projekte të reja që do të ndihmojnë komunitetet minoritare të kalojnë sfidat me të cilat përballen.
“Ministri Rashiq shprehu gatishmërinë për të vazhduar përmirësimin e aktiviteteve në kuadër të bashkëpunimit me IOM-in, duke theksuar se investimi në komunitetet pakicë është çelësi për stabilitetin afatgjatë. Siç e theksoi ai, projektet e ardhshme do të jenë të fokusuar në qëllime strategjike afatgjata, të cilat do të kontribuojnë në zhvillimin e qëndrueshëm dhe kushte më të mira jetese për të gjithë qytetarët, pa marrë parasysh identitetin e tyre etnik ose fetar”, thuhet në njoftim.
Tutje në njoftim thuhet se ky takim konfirmoi edhe një herë përkushtimin e Ministrisë për Komunitete dhe Kthim në krijimin e një shoqërie gjithëpërfshirëse, ku të gjithë qytetarët do të kenë mundësi të barabarta për përparim dhe zhvillim.
