Policia e Kosovës njofton se një shtetas turk është arrestuar të mërkurën në Prishtinë, pasi kërkohej përmes INTERPOL-it me urdhërarrest ndërkombëtar të lëshuar nga Turqia.
Shtetasi turk E.S., dyshohet se ka qenë pjesë e një grupi të krimit që përfitonte financiarisht nga rekrutimi i grave për detyrim në prostitucion.
“Sot me datë 19.03.2025 rreth orës 14:300, zyrtarë policorë nga Drejtoria për Bashkëpunim Ndërkombëtar Policor, kanë bërë arrestimin e një personi shtetas turk me inicialet E.S., i lindur 1981, i kërkuar përmes INTERPOL-it me urdhër arrest ndërkombëtar lëshuar nga Turqia, pasi që i njëjti dyshohet se ka qenë pjesë e një grupi të krimit të organizuar që përfitonte financiarisht nga rekrutimi i grave për detyrim në prostitucion”, thuhet në njoftimin e PK-së.
Bëhet e ditur se me urdhër të prokurorit kujdestar i arrestuari dërgohet në ndalim policor për 48 ore për të vazhduar me procedurat tjera ligjore.
