Siç raportojnë mediat në Maqedoni, qyteti i Koçanit është bosh, pasi të gjithë po shkojnë drejt varrezave, në varrimin e viktimave të pafajshme. Qytetarë nga të gjitha pjesët e Maqedonisë së Veriut erdhën në varrim për të shprehur ngushëllimet, dhimbjen dhe pikëllimin e tyre.
Në rrugët e Koçanit sot ka shumë policë dhe inspektorë me veshje civile. Pranë varrezave, ka mjekë dhe teknikë mjekësorë të gatshëm për të ndihmuar njerëzit të kalojnë këtë ditë më të trishtë në historinë e fundit të Maqedonisë së Veriut.
Natën fatale, 59 persona humbën jetën në një diskotekë, kur siç dyshojnë hetuesit, zjarri ka rënë për shkak të përdorimit të mjeteve piroteknike në një koncert të grupit ADN dhe për shkak të materialit shumë të ndezshëm në çatinë e ndërtesës, zjarri është përhapur me shpejtësi.
Për përmasat e tragjedisë që i ndodhi Koçanit dëshmon edhe fakti se të nesërmen ka vdekur njeriu që i ka transportuar fëmijët dhe njerëzit e mbijetuar atë mbrëmje, shoferi i ambulancës së Koçanit, Ila Goçevski. Zemra e tij nuk e duroi dot pas 11 udhëtimeve pa ndalesë me pacientë në Shkup. Ai ka dëgjuar britmat më të frikshme gjatë transportit të të rinjve që luftojnë për jetën, shkruan Radio Koçani.
Shumë persona kanë mbetur të lënduar, 196 prej tyre, ndërsa spitalet e Maqedonisë nuk kanë mundur të strehojnë një numër kaq të madh të pacientëve, kështu që shumë janë transferuar në spitalet e rajonit dhe jashtë vendit.
Edhe Ministria e Shëndetësisë e Maqedonisë së Veriut ka bërë të ditur sot emrat e të gjithë viktimave. Viktima më e re ishte 16 vjeç dhe më e vjetra 48.
30 persona janë varrosur në varrezat e Koçanit. Funerale mbahen edhe në Shtip, Obleshevë dhe Shkup.
